12 снежня ў Магілёўскай абласной бібліятэцы імя У.І. Леніна адбылася прэзентацыя ўнікальнага факсімільнага выдання першага на тэрыторыі Усходняй Еўропы “Буквара”, які пабачыў свет у 1618 годзе.
Выданне “Буквара” ў гэтым годзе было не выпадковым – першая ў свеце кніга, якая мела менавіта такую назву, была выпушчана ў 1618 годзе брацкай друкарняй Віленскага Свята-Духава праваслаўнага брацтва ў мястэчку Еўе (сучасны г. Вевіс каля Вільнюса).
На прэзентацыі 400-гадовага “Буквара” намеснік дырэктара Нацыянальнай бібліятэкі Аляксандр Суша падрабязна распавёў пра гістарычныя ўмовы з'яўлення “Буквара” на нашых землях, пра акалічнасці яго перавыдання ў наш час. Напрыканцы імпрэзы ён перадаў у дар асобнікі факсіміле Магілёўскай абласной бібліятэцы імя У.І. Леніна, публічным бібліятэкам, установам адукацыі і музеям Магілёўскай вобласці, Бабруйскай і Магілёўскай епархіям Беларускай праваслаўнай царквы.
Да нашага часу захавалася толькі два асобнікі “Буквара” – адзін з іх захоўваецца ў Каралеўскай бібліятэцы Даніі, а другі з'яўляецца ўласнасцю Бібліятэкі Ганаровага таварыства Мідл Тэмпл у Вялікабрытаніі. Пасля навуковага даследавання і перамоў з кіраўніцтвам брытанскай бібліятэкі, быў атрыманы дазвол на выданне факсімільнай версіі.
Партнёрамі па факсімільным ўзнаўленні найстарэйшага “Буквара” выступілі Бібліятэка Ганаровага таварыства Мідл Тэмпл у Лондане, Пасольства Рэспублікі Беларусь у Злучаным Каралеўстве Вялікабрытаніі і Паўночнай Ірландыі, Міністэрства культуры Рэспублікі Беларусь, Міжнародная асацыяцыя беларусістаў, Беларускі дзяржаўны ўніверсітэт, Міністэрства адукацыі Рэспублікі Беларусь, Еўрапейскі банк рэканструкцыі і развіцця, а таксама Беларускі банк развіцця і рэканструкцыі “Белінвестбанк”.
Матэрыял прадастаўлены аддзелам сувязей з грамадскасцю.