13 снежня ў бібліятэцы прайшла творчая сустрэча “Апантаны Бацькаўшчынай”, прысвечаная 90-годдзю акадэміка Нацыянальнай акадэміі навук Беларусі Радзіма Гарэцкага.
Арганізатары – Нацыянальная бібліятэка Беларусі і грамадскае аб'яднанне “Беларускі фонд культуры” (БФК). Творчая сустрэча прайшла ў рамках праекта БФК “Мой род – мая радзіма”.
Вядучым мерапрыемства стаў пісьменнік, журналіст, дзяржаўны і грамадскі дзеяч, намеснік старшыні БФК Анатоль Бутэвіч.
Павіншаваць юбіляра прыехалі старшыня БФК Тадэвуш Стружэцкі, рэдактар газеты "Краязнаўчая" Уладзімір Гілеп, мастак, паэт, старшыня Беларускага саюза мастакоў Рыгор Сітніца і іншыя прадстаўнікі творчай інтэлігенцыі, вучоныя і журналісты.
Акадэмік Нацыянальнай акадэміі навук Беларусі Радзім Гарэцкі падарыў Нацыянальнай бібліятэцы Беларусі адну са сваіх апошніх кніг – “Апантаны Бацькаўшчынай: Жыццёвы меланж – 2” з аўтографам.
Першы намеснік дырэктара Нацыянальнай бібліятэкі Беларусі Алена Далгаполава падзякавала юбіляру за кнігу, павіншавала з круглай датай і пажадала далейшых творчых поспехаў у літаратурнай дзейнасці.
На творчай сустрэчы Радзім Гаўрылавіч падзяліўся гісторыяй сваёй сям'і, распавёў пра навуковую і літаратурную дзейнасць, пра Гарэцкія чытанні і свайго знакамітага дзядзьку Максіма Гарэцкага.
Напрыканцы мерапрыемства Анатоль Бутэвіч зачытаў пісьмовыя віншаванні і тэлеграмы да юбілею акадэміка.
Творчы вечар прайшоў у суправаджэнні музычных нумароў у выкананні народнай артысткі Беларусі Таццяны Мархель.
Матэрыял падрыхтаваны аддзелам сувязей з грамадскасцю.