6 верасня ў межах XXVII Дня беларускага пісьменства на пляцоўцы Бялыніцкага раённага цэнтра культуры Нацыянальнай бібліятэкай Беларусі былі выстаўлены конкурсныя работы, якія занялі прызавыя месцы ў ХХVIII Рэспубліканскім конкурсе “Бібліятэка – асяродак нацыянальнай культуры”.
Конкурс праводзіцца сярод публічных бібліятэк краіны штогод. Яго правядзенне – гэта не толькі пацверджанне выключнасці і індывідуальнасці бібліятэк, дэманстрацыя некаторых дасягненняў, але і абмен вопытам, самаацэнка сваёй працы, адкрыццё новых даляглядаў, прыцягненне новых карыстальнікаў, стымул для творчасці і прафесійнага росту бібліятэкараў.
Па выніках конкурсу дыпломамі першай, другой і трэцяй ступеняў былі адзначаны 22 публічныя бібліятэкі, 10 бібліятэк прадстаўлены да заахвочвання. Пераможцы атрымалі ўзнагароды ў адпаведнасці з загадам Міністэрства культуры Рэспублікі Беларусь № 93 ад 15 чэрвеня 2020 г. “Аб выніках XXVIII рэспубліканскага конкурсу «Бібліятэка – асяродак нацыянальнай культуры»”.
Выстава карысталася вялікай папулярнасцю як сярод удзельнікаў, што былі задзейнічаны ў рэспубліканскай навукова-практычнай канферэнцыі “Бялыніцкія чытанні – 2020”, так і сярод тых, каму цікавыя каштоўныя напрацоўкі і прафесійны вопыт у справе адраджэння нацыянальнай культуры, гісторыі, літаратуры, мовы, фальклорна-этнаграфічнай спадчыны.
Наведвальнікі выставы адзначылі высокі ўзровень конкурсных работ бібліятэк-пераможцаў, іх арыгінальнасць і якаснае выкананне. Практычна кожная работа ўтрымлівае ўласныя распрацоўкі, рэкламную і інфармацыйную прадукцыю; суправаджаецца электроннымі прэзентацыямі, відэаматэрыяламі, гульнявымі праграмамі, сцэнарамі і г. д.
Творчая экспазіцыя стала наглядным дапаможнікам для рэалізацыі бібліятэкамі новых задумак і планаў пры падрыхтоўцы матэрыялаў да наступнага XXIX рэспубліканскага конкурсу.
Матэрыял пададзены навукова-даследчым аддзелам бібліятэказнаўства.