Вось і скончыўся яркі шматлюдны Дзень беларускага пісьменства! Урачыстасць запомнілася ўсім сапраўдным святам для прыхільнікаў беларускай культуры, мовы і літаратуры і падарыла цікавыя сустрэчы з пісьменнікамі, мастакамі, новыя кнігі, майстар-класы, прэзентацыі, сюрпрызы, мора ўсмешак і пазітыву.
Нацыянальная бібліятэка Беларусі таксама прымала ўдзел у святкаванні XXVII Дня беларускага пісьменства ў Бялынічах. Нагадаем, чым здзіўляла гасцей галоўная бібліятэка краіны.
На пляцоўцы Бялыніцкага раённага цэнтра культуры была разгорнута кніжна-ілюстрацыйная выстаўка “Духоўныя скарбы зямлі беларускай”. У экспазіцыі можна было азнаёміцца з вельмі цікавымі і багата ілюстраванымі выданнямі з фонда бібліятэкі: кнігі аб праваслаўных і каталіцкіх храмах нашай краіны, помніках сакральнага жывапісу і станаўленні іканапіснай школы на беларускіх землях. Асобны раздзел выстаўкі – “Жыровіцкая святыня” – быў прысвечаны Жыровіцкаму Успенскаму мужчынскаму кляштару, дзе захоўваецца святыня, шанаваная не толькі беларусамі, але і вернікамі іншых краін. Частка выстаўкі “Іконы: даследванні” змяшчала выданні аб феномене іконы з пункту гледжання тэалогіі, іканаграфіі і нават уфалогіі.
А на выстаўцы творчых работ па выніках рэспубліканскага конкурсу “Бібліятэка – асяродак нацыянальнай культуры” наведвальнікі змаглі ўбачыць лепшыя работы пераможцаў. Конкурс праводзіцца сярод публічных бібліятэк Беларусі з мэтай раскрыцця творчага патэнцыялу і распаўсюджвання нацыянальнай гісторыі, мовы і культуры.
Нацыянальная бібліятэка Беларусі сумесна з бібліятэчнымі, архіўнымі і навуковымі ўстановамі нашай краіны паспяхова працуе над шэрагам віртуальных і мультымедыйных праектаў па папулярызацыі гісторыі і культуры Беларусі. Да свята была падрыхтавана прэзентацыя “Інфармацыйныя скарбы зямлі беларускай. Магілёўшчына”.
На цырымоніі ўзнагароджання пераможцаў рэспубліканскага конкурсу буктрэйлераў “Кніга з экрана” намеснік генеральнага дырэктара Нацыянальнай бібліятэкі Беларусі Аляксандр Суша ўручыў фіналістам спецыяльны прыз – факсімільнае выданне першага “Буквара” (1618).
Таксама ў межах свята бібліятэка перадала для фондаў Дзяржаўнай установы культуры “Бялыніцкая цэнтралізаваная бібліятэчная сетка” 70 выданняў, сярод якіх мастацкая, навукова-папулярная, энцыклапедычная літаратура.
Да новых сустрэч у Копылі ў наступным годзе!
Фота Элы Дзвінскай.
Матэрыял пададзены аддзелам сувязей з грамадскасцю.