14 лютага, у Міжнародны дзень дарэння кніг (International Book Giving Day), у Нацыянальнай бібліятэцы Беларусі адбылася прэзентацыя кнігі “Бренды Беларуси”.
Унікальнае выданне прэзентуе 100 значных, маштабных і паспяховых брэндаў нашай краіны. Кожнаму з іх прысвечана 6–12 старонак з інфармацыяй пра гісторыю брэнда, яго развіццё, дасягненні і найбольш значную прадукцыю. Гэтая кніга дэманструе шматграннасць і патэнцыял эканомікі Беларусі на прыкладах эфектыўных брэндаў і іх паспяховых кейсаў у самых розных сферах. 100 яркіх гісторый, сабраных у адным выданні, – відавочнае сведчанне таго, што “Зроблена ў Беларусі” – гэта сінонім якасці, крэатыўнасці, адказнага падыходу да спажыўцоў і паказчык паспяховасці беларускіх прадпрыемстваў і брэндаў.
У мерапрыемстве ўзялі ўдзел намеснік старшыні праўлення ААТ “ААБ Беларусбанк” Дзмітрый Краскоўскі, намеснік генеральнага дырэктара Нацыянальнай бібліятэкі Беларусі Віктар Пшыбытка, дырэктар ТАА “РэнесансПаблішынг” Уладзімір Пілат, кліенты праекта – прадстаўнікі прадпрыемстваў “Амкадор”, “Атлант”, “Белтэлекам”, Белкамунмаш, “Камунарка”, “Мінск-Крышталь”, МАЗ, МТЗ, “ПАТИО”, “Стравіта”.
У рамках прэзентацыі Нацыянальнай бібліятэцы Беларусі перадалі ў дар экзэмпляры выдання “Бренды Беларуси”, якое стане каштоўным папаўненнем калекцыі галоўнай бібліятэкі краіны.
Госці мерапрыемства маглі азнаёміцца з выставай-праглядам выданняў з фонду Нацыянальнай бібліятэкі Беларусі. Яны адлюстроўваюць гісторыю, дасягненні і сучасны ўзровень беларускіх брэндаў, прадстаўленых у кнізе. Сярод кніг – юбілейныя і навукова-папулярныя выданні, манаграфіі, фотаальбомы і буклеты.
Матэрыял пададзены аддзелам сувязей з грамадскасцю.
