26 лістапада спаўняецца 90 гадоў з дня нараджэння класіка беларускай літаратуры Уладзіміра Караткевіча. Разам з дзеткамі цытуем аднаго з самых яркіх і самабытных прадстаўнікоў беларускай літаратуры ХХ стагоддзя.
У межах “Клуба кніжных прафесараў” у сувязі з эпідэміялагічнай сітуацыяй дзеткам прапануецца выканаць творчае заданне дыстанцыйна і стварыць плакаты з цытатамі Уладзіміра Караткевіча.
Цытата – гэта даслоўная вытрымка з якога-небудзь тэксту, якая перадае сутнасць твора ў кароткай форме. Яна лёгка можа заінтрыгаваць і захапіць. Для афармлення тэксту трэба прадумаць яго размяшчэнне, колер і шрыфт.
Нацыянальная бібліятэка Беларусі адабрала самыя яркія цытаты з твораў пісьменніка.
- Быў. Ёсць. Буду!
- На Беларусі Бог жыве!
- Той, хто кахае – бессмяротны!
- Кожны чалавек носіць сваё неба з сабой.
- Калі чалавек, кожны чалавек, вельмі захоча зрабіць другому хоць маленькае дзіва – свет зробіцца светам дзіваў.
- Рабі нечаканае, рабі, як не бывае, рабі, як ня робіць ніхто – і тады пераможаш!
- Хто забыў сваіх продкаў – сябе губляе,
Хто забыў сваю мову – усё згубіў. - Дзе мой край? Там, дзе людзі ніколі ня будуць рабамі!
Плакат – гэта зведзенае ў выразную візуальную формулу паведамленне. Ён павінен быць добра бачны на адлегласці і зразумелы гледачу. Для стварэння плаката можна выкарыстаць малюнкі пісьменніка. Уладзімір Караткевіч ужо з дзяцінства пісаў апавяданні, вершы і аздабляў іх малюнкамі. Пазней ён маляваў у лістах да сяброў, на палях рукапісаў, у нататніках і канспектах лекцый. Мастацкая спадчына Караткевіча змяшчае партрэтныя замалёўкі, сяброўскія шаржы, аўташаржы, малюнкі на гістарычныя тэмы. Усе яны выкананы алоўкам альбо чарнілам. Праз малюнкі пісьменніка асабліва выяўляюцца асоба творцы, яго ўнутраны свет.
Малюнкі пісьменніка захоўваюцца ў фондах Музейнага комплексу гісторыі і культуры Аршаншчыны, Цэнтральнай навуковай бібліятэцы імя Якуба Коласа Нацыянальнай акадэміі навук Беларусі, Беларускага дзяржаўнага архіва-музея літаратуры і мастацтва, а таксама ў прыватных архівах. Малюнкі друкаваліся і іх можна паглядзець у наступных кнігах:
- Свет вачыма Караткевіча : (малюнкі, аўтапартрэты, карыкатуры, шаржы) : [зборнік / укладальнікі: В. Сіднякова і інш.]. – Орша : Аршанская друкарня, 2006. – 115, [1] с.
- Караткевіч, Уладзімір Сямёнавіч. Збор твораў : у 25 т. / Уладзімір Караткевіч ; [прадмова, падрыхтоўка тэкстаў і каментарыі А. Вераб’я ; рэдкалегія: А. Бельскі і інш.] ; Беларускі дзяржаўны ўніверсітэт, Філалагічны факультэт. – Мінск : Мастацкая літаратура, 2012 –. Т. 18 : Малюнкі [Выяўленчы матэрыял] / рэдактар тома Анатоль Верабей ; [падрыхтоўка малюнкаў і каментарыі М. Кенькі]. – 2019. – 509, [1] с. : іл., партр.
Скачаць прапанаваныя малюнкі можна тут.
Матэрыял пададзены навукова-даследчым аддзелам кнігазнаўства.