15 сакавіка ў бібліятэцы адбылася ўрачыстая цырымонія ўручэння пашпартоў і членскіх білетаў БРСМ лепшым прадстаўнікам таленавітай моладзі Першамайскага раёна ў рамках акцыі “Мы – грамадзяне Беларусі!”.
Усебеларуская патрыятычная акцыя “Мы – грамадзяне Беларусі!” праводзіцца з 2004 года па ініцыятыве БРСМ і займае дастойнае месца сярод іншых рэспубліканскіх патрыятычных праектаў. Па традыцыі штогод цырымонія ўручэння пашпартоў прымеркавана да Дня Канстытуцыі Рэспублікі Беларусь. Гэта вельмі сімвалічна, таму што асноўнай мэтай акцыі з’яўляецца патрыятычнае выхаванне моладзі, развіццё ўстойлівага жадання садзейнічаць працвітанню роднай краіны.
Пачалося святочнае мерапрыемства з выканання Дзяржаўнага гімна Рэспублікі Беларусь. Падчас цырымоніі маладыя таленавітыя навучэнцы − удзельнікі і пераможцы шматлікіх конкурсаў, алімпіяд, спаборніцтваў − атрымалі свае пуцёўкі ў дарослае жыццё. Галоўны дакумент уручылі юным грамадзянам ганаровыя госці: намеснік старшыні адміністрацыі Першамайскага раёна г. Мінска Алена Анатольеўна Асадчая і старшыня Першамайскай раённай г. Мінска арганізацыі рэспубліканскага грамадскага аб’яднання “Белая Русь” Людміла Пятроўна Мацюшкова. Алена Анатольеўна ў сваім выступленні падкрэсліла, што пашпарт – гэта гонар кожнага грамадзяніна за нашу краіну, у якой усе мы маем магчымасць мірна жыць і вучыцца. Асаблівыя словы падзякі яна выказала тым неардынарным асобам, якія вырашылі папоўніць рады БРСМ.
Ад імя Палаты прадстаўнікоў Нацыянальнага сходу Рэспублікі Беларусь вучняў павіншаваў дэпутат Зыгмунд Антонавіч Валевач. “Вы – наша будучыня, тыя, хто будзе працягваць і зберагаць нашы традыцыі”, − адзначыў Зыгмунд Антонавіч у сваім віншаванні.
Дэпутат Мінскага гарадскога Савета дэпутатаў 27-га склікання Наталля Уладзіміраўна Маркоўка і першы сакратар БРСМ Першамайскага раёна Алена Эдуардаўна Лісай уручылі актывістам членскія білеты БРСМ. Маладзёжная арганізацыя папоўнілася лепшымі прадстаўнікамі таленавітых навучэнцаў.
На цырымоніі таксама прысутнічалі першы намеснік дырэктара Нацыянальнай бібліятэкі Беларусі Алена Ерамееўна Далгаполава, начальнік упраўлення адукацыі, спорту і турызму адміністрацыі Першамайскага раёна г. Мінска Людміла Міхайлаўна Барысенка.
Напрыканцы цырымоніі ў выкананні Ігара Мураўкіна, пераможца раённага конкурсу патрыятычнай песні, прагучала песня “Званы”.
Пасля ўрачыстай часткі мерапрыемства для моладзі была арганізавана экскурсія па Нацыянальнай бібліятэцы Беларусі.