25 красавіка адбылося чарговае мерапрыемства праекта “На хвалі часу, у плыні жыцця”, які ладзіць на працягу 2019–2023 гг. Нацыянальная бібліятэка Беларусі сумесна з Дзяржаўным музеем гісторыі беларускай літаратуры, Беларускім дзяржаўным архівам-музеем літаратуры і мастацтва і часопісам “Маладосць” да 100-годдзя Усебеларускага літаратурнага аб’яднання “Маладняк”.
У межах віртуальнага праекта ў Дзяржаўным музеі гісторыі беларускай літаратуры прайшла лекцыя “ТАВІЗ – літаратурная багема 1930-х гг.”, якую падрыхтаваў вядучы навуковы супрацоўнік Беларускага дзяржаўнага архіва-музея літаратуры і мастацтва паэт Віктар Жыбуль – лаўрэат літаратурнай прэміі “Празрысты Эол” (2018) за даследаванне дзейнасці ТАВІЗу.
На пачатку 1930-х гадоў у Беларусі практычна завяршаецца “ўладкаванне” літаратурнага працэсу як ідэалагічна правільна скіраванай часткі сістэмы. У гэты час узнікае ТАВІЗ – нефармальная творчая суполка літаратараў, якая была непадкантрольная партыйным ідэолагам і цэнзарам і стала багемным выклікам літаратурнаму афіцыёзу. У розныя часы ў яе ўваходзілі Змітрок Астапенка, Міхась Багун, Юрка Віцьбіч, Сяргей Дарожны, Алесь Дудар, Алесь Звонак, Васіль Каваль, Тодар Кляшторны, Максім Лужанін, Валеры Маракоў, Эдуард Самуйлёнак, Юлі Таўбін, Уладзімір Хадыка.
Даследчык пазнаёміў слухачоў з творчасцю асобных пісьменнікаў-маладнякоўцаў, што ўваходзілі ў ТАВІЗ, правёў віртуальную экскурсію па вуліцах Мінска 1930-х гг. і месцах, дзе літаратары збіраліся.
Лекцыю Віктара Жыбуля наведала паэтэса, літаратуразнаўца, даследчыца літаратуры гэтага перыяду Ірына Багдановіч разам са сваімі студэнтамі.
Наступнае мерапрыемства сумеснага праекта “На хвалі часу, у плыні жыцця” ладзіцца 13 мая да юбілею з дня нараджэння яшчэ аднаго сябра “Маладняка” Паўлюка Труса. Вечар, да якога сумесна з Нацыянальнай бібліятэкай Беларусі рыхтуецца часовая экспазіцыя фотаздымкаў і кніг паэта, зноў пройдзе ў Дзяржаўным музеі гісторыі беларускай літаратуры.
Запрашаем усіх зацікаўленых!
Тэлефон для даведак: (8 017) 293 29 69.
Матэрыял прадстаўлены інфармацыйна-аналітычным аддзелам.
Чытайце таксама: