25 красавіка адбылася мультымедыйная лекцыя-прэзентацыя “Фартэпіяна – інструмент, на якім можна выканаць усё...”, арганізаваная ў рамках сумеснага праекта Нацыянальнай бібліятэкі Беларусі і Нацыянальнай акадэміі навук Беларусі.
Гэта другая сустрэча з лектарам Ірынай Леанідаўнай Гарбушынай, кандыдатам мастацтвазнаўства, якая працягнула знаёмства з гэтым унікальным інструментам. Шырокі дыяпазон фартэпіяна і яго ўніверсальныя магчымасці дазваляюць выконваць творы, напісаныя для розных выканальніцкіх складаў, у тым ліку оперы і балеты. Лектар цікава расказала пра мастацтва фартэпіяннай транскрыпцыі і паказала відэафрагменты выступленняў выдатных піяністаў.
Гледачы змаглі параўнаць некалькі віртуозных выкананняў знакамітага “Палёту чмяля” М.А. Рымскага-Корсакава, пачулі транскрыпцыю “Адажыа” Т. Альбіноні ў выкананні Ігара Алоўнікава і “Малагенью” ў выкананні Ю. Блінова.
Запрашаем на наступныя мерапрыемствы.
Уваход вольны (пры наяўнасці чытацкага білета або пропуска сацыякультурнага цэнтра).
Тэлефон для даведак: (8 017) 293 27 52.
Матэрыял прадастаўлены аддзелам абслугоўвання спецыялізаванымі фондамі.