16 сакавіка ў бібліятэцы прайшла прэзентацыя кнігі Марыны Мулявінай і Вольгі Брылон “Владимир Мулявин и Лидия Кармальская. Недосказанное…”.
Як правіла, жыццё вядомых і легендарных людзей заўсёды навідавоку ў прыхільнікаў і знаўцаў іх творчасці. Але ў любой біяграфіі, наколькі б асветленай у друку яна ні была, заўсёды ёсць белыя плямы, невядомыя факты, асабістыя моманты, утоеныя за сцэнічнай шырмай. Схаваныя ад усеагульнага агляду і абмеркавання, яны застаюцца ў памяці родных і блізкіх людзей.
Аўтар кнігі – дачка Уладзіміра Георгіевіча Марына Мулявіна – доўгі час не рашалася публікаваць асабістыя пісьмы і фатаграфіі бацькі і маці. Але просьбы і прапановы выдаць кнігу пра бацькоў працягвалі паступаць, і ў выніку ў суаўтарстве з вядомым музыказнаўцай Вольгай Брылон Марына напісала кнігу ўспамінаў, даследаванняў і публіцыстыкі пра бацьку – музыканта і заснавальніка легендарнай групы “Песняры”.
На прэзентацыі сабраліся знаўцы творчасці “Песняроў”, блізкія сябры і калегі Уладзіміра Мулявіна, якія ведалі яго не толькі як таленавітага музыканта, але і як выдатнага чалавека. Заслужаныя артысты Рэспублікі Беларусь Уладзіслаў Місевіч і “залаты голас” легендарнага ВІА Леанід Барткевіч, вядомы кампазітар і сябар “галоўнага песняра” Ігар Лучанок, рэжысёр-пастаноўшчык музычнага фільма “Песняры” і фільмаў пра Уладзіміра Мулявіна ў рамках тэлевізійнага праекта “Зваротны адлік” Уладзімір Арлоў, мастацкі кіраўнік – галоўны дырыжор Нацыянальнага акадэмічнага народнага аркестра Рэспублікі Беларусь імя І. Жыновіча Міхаіл Казінец і іншыя прадстаўнікі творчай інтэлігенцыі прыйшлі на прэзентацыю, каб узгадаць свае ўспаміны і раздзяліць гэтую сустрэчу з тымі, хто сапраўды неабыякавы да творчасці В. Мулявіна.
Уражаннямі пра выданне падзяліўся ганаровы госць мерапрыемства – намеснік міністра культуры Рэспублікі Беларусь Васіль Чэрнік. У сваім выступленні ён адзначыў, што Уладзімір Мулявін – гэта ўнікальная асоба! Сёння ў культуры засталося мала людзей, якія змаглі б на такім высокім узроўні, гэтак жа ярка і магутна прадстаўляць і папулярызаваць беларускую культуру ва ўсім свеце.
На прэзентацыі можна было не толькі пачуць сенсацыйныя факты, але і ўбачыць арыгіналы пісем Уладзіміра Мулявіна і Лідзіі Кармальскай, сцэнічныя касцюмы музыкантаў ансамбля “Песняры”, матрыцу першага дыска-гіганта ансамбля і першы дыск-гігант з аўтографамі ўдзельнікаў калектыву.
Упрыгожваннем вечара стала выступленне беларускіх артыстаў – салісткі Беларускай дзяржаўнай філармоніі Ганны Янкоўскай, вядомага выканаўца, уладальніка Гран-пры фестывалю “Славянский базар – 2003” Макса Лоранса, таленавітага спевака і музыканта Яна Жанчака. У іх выкананні вядомыя кампазіцыі легендарнага калектыву “Вераніка”, “Александрына”, “Завушніцы” прагучалі па-новаму, свежа і сучасна, але гэтак жа стыльна і гэтак жа па-беларуску, як калісьці ў “Песняроў”.
Нягледзячы на тое што кніга выйшла невялікім тыражом, у фондзе Нацыянальнай бібліятэкі яна неўзабаве з’явіцца – аўтары падарылі нам адзін з экзэмпляраў выдання падчас мерапрыемства. Намеснік дырэктара Нацыянальнай бібліятэкі Беларусі па інфармацыйных рэсурсах Таццяна Кузьмініч падзякавала за падарунак і выдатны творчы вечар:
– Уладзімір Мулявін – вельмі таленавіты чалавек, адзін з тых, хто ўзнес беларускую мову да вяршынь песеннай творчасці. Сёння мы прысутнічаем на гэтым выдатным мерапрыемстве, але неўзабаве яно завершыцца. А заўтра з намі застанецца гэта кніга, гэта аповесць, гісторыя таленавітага чалавека, да якой будуць звяртацца гісторыкі, фалькларысты, музыказнаўцы і проста прыхільнікі творчасці “Песняроў”.
 |
 |
 |
|
|
 |
|
 |
|
 |
|
|
|
|
|
|
|
|
