З 17 сакавіка па 30 красавіка ў зале беларускай літаратуры (пам. 205) праходзіць выстаўка “З верай у Вышэйшую Справядлівасць…”, прымеркаваная да 90-годдзя з дня нараджэння беларускага пісьменніка Хведара Жычкі.
За многія гады актыўнай творчай працы Хведар Дзмітрыевіч Жычка (1927–2007) стаў вядомы шматлікім чытачам як аўтар вершаў, аповесцей і апавяданняў. Рамантыка марской службы, праца, хараство роднай прыроды, вера ў перамогу праўды і розуму, інтэрнацыяналізм, маральная чысціня чалавека – асноўныя тэмы, якія закранаў у сваёй творчасці пісьменнік.
Адкрываюць выстаўку творы пісьменніка-юбіляра. Сярод іх – паэтычныя зборнікі “Стой на вахце, сэрца” (1961), “Росныя лілеі” (1965), “Настой” (1968), “Абавязак” (1979), “Абдымкі сонца” (1988), “Яшчэ адзін пракос” (1991), “Святога вечара чакаю” (1995), гумарэскі, фельетоны, пародыі “Спагадлівыя людзі” (1977), аповесць “Косць твая і плоць твая” (2014) і інш.
Аматараў дзіцячай літаратуры зацікавяць прадстаўленыя ў другім раздзеле экспазіцыі аповесці “Каштанавы Масквіч” (1959), “Піфагоравы штаны” (1961), “Дзе растуць бяссмертнікі” (1977), апавяданні “Букет вяргіняў” (1970), вершы “Сонца скача па траве” (1989), “Грыбны дождж” (1995) і інш. З правіламі дарожнага руху дзяцей пазнаёмяць навукова-папулярныя нарысы “Мая вуліца” (1970), “Мы па вуліцы ідзём” (з І. Чыжэўскім, 1973).
Перакладам Х. Жычкі прысвечаны трэці раздзел выстаўкі. Дзякуючы пісьменніку, на беларускай мове загучалі драма Л. Украінкі “Лясная песня”, раманы М. Алейніка “Жылюкі” і Б. Ногейла “Паводка”, а таксама асобныя творы А. Міцкевіча, І. Франко, Я. Райніса і інш. Асобай увагі заслугоўвае зборнік выбраных перакладаў “Вокны ў сад” (1987).
Дапаўняюць экспазіцыю літаратурна-крытычныя публікацыі пра жыццё і творчасць юбіляра.
Кантактны тэлефон: (8 017) 293 27 16.