5–6 верасня Нацыянальная бібліятэка Беларусі прыме ўдзел у святкаванні Дня беларускага пісьменства, якое адбудзецца ў г. Шчучыне Гродзенскай вобласці.
У дні святочных мерапрыемстваў бібліятэка арганізуе кніжную выстаўку да 70-годдзя Перамогі "Памяць аб вайне нам кніга пакідае" (шчучынскі раённы Дом культуры). Экспазіцыя прадстаўляе ўнікальныя выданні перыяду Вялікай Айчыннай вайны, сярод якіх партызанскія рукапісныя часопісы і насценгазеты, акупацыйныя выданні, кнігі беларускіх выдавецтваў у эвакуацыі. На выстаўцы будзе прадстаўлена больш за 80 экспанатаў.
У рамках фестывалю кнігі і прэсы 6 верасня ў 14.10 на плошчы Свабоды, галоўная бібліятэка краіны прэзентуе і перадасць у дар Шчучынскай цэнтральнай раённай бібліятэцы шосты том факсімільнага выдання "Кніжная спадчына Францыска Скарыны". Нацыянальная бібліятэка сумесна з Банкам "БелВЭБ" працуюць над сумесным праектам па факсімільным выданні поўнага рэпертуару кніг, якія былі надрукаваны Францыскам Скарынам.
Напярэдадні святкавання 500-годдзя беларускага кнігадрукавання бібліятэкай падрыхтавана кніжная выстаўка, прысвечаная асобе ўсходнеславянскага першадрукара і гісторыі беларускай кнігі. У экспазіцыю ўвайшлі энцыклапедычныя, навуковыя, навукова-папулярныя выданні, мастацкая літаратура, у тым ліку пяць тамоў факсімільнага ўзнаўлення кніжнай спадчыны Скарыны, альбом "Кніжная спадчына Беларусі".
Да 85-годдзя з дня нараджэння Уладзіміра Караткевіча будзе прадстаўлена выстаўка "Свет шчодры, свет мяне паўторыць...". У экспазіцыю ўвайшлі кнігі з творамі пісьменніка на беларускай мове і ў перакладах на іншыя мовы свету, а таксама біяграфічныя выданні.
Тэлефоны для даведак: (8 017) 293 27 56.
Е-mail: pr@nlb.by
