27 студзеня ў бібліятэцы адбыўся семінар “Формы культурна-адукацыйнай дзейнасці ў бібліятэках і музеях Польшчы”.
Мерапрыемства ў рамках Года культуры было арганізавана Нацыянальнай бібліятэкай Беларусі, Беларускай бібліятэчнай асацыяцыяй і Беларускім дзяржаўным музеем народнай архітэктуры і побыту. У мерапрыемстве прынялі ўдзел спецыялісты бібліятэк і музеяў Мінска.
З прывітальным словам выступіла загадчык навукова-даследчага аддзела кнігазнаўства Нацыянальнай бібліятэкі, старшыня камітэта па ахове кніжных помнікаў Беларускай бібліятэчнай асацыяцыі Галіна Кіреева. Яна падкрэсліла, што заяўленая тэма семінара з’яўляецца вельмі актуальнай у Год культуры, калі асаблівую важнасць набывае культурна-асветніцкая дзейнасць бібліятэк па папулярызацыі кнігі і кніжнай культуры.
Загадчык сектара навукова-праектнай работы Таццяна Сапега расказала пра культурна-асветніцкі праект “У госці да кніг”, які стартаваў ў пачатку года па ініцыятыве Нацыянальнай бібліятэкі Беларусі і накіраваны на прыцягненне ўвагі дзяцей да бібліятэкі і музея, развіццё ў іх цікавасці да кнігі і нацыянальнай кніжнай спадчыны. Мэтай праекта з’яўляецца вывучэнне айчыннага і замежнага вопыту культурна-асветніцкай дзейнасці і выпрацоўка ўласнай методыкі правядзення заняткаў для дзяцей па папулярызацыі кніжных каштоўнасцей.
Навуковы супрацоўнік навукова-экспазіцыйнага аддзела Беларускага дзяржаўнага музея народнай архітэктуры і побыту Ірына Юдзіна прадставіла грунтоўны даклад і падзялілася вопытам, расказаўшы пра культурна-адукацыйныя праекты, якія былі рэалізаваны ў польскіх музеях. Дакладчыца прайшла стажыроўку ў Польшчы для супрацоўнікаў беларускіх музеяў у рамках праекта “Актыўны музей”.
Семінар праходзіў у інтэрактыўнай форме, у ходзе яго абмяркоўваліся пытанні ўзмацнення цікавасці да бібліятэк і музеяў, павелічэння колькасці карыстальнікаў і наведвальнікаў, у гэтым жа ракурсе былі прааналізаваны культурна-адукацыйныя праекты.
 |
 |
 |
 |
 |
 |
