25 лютага ў аддаленым рэжыме адбыўся V Рэспубліканскі семінар “Гісторыя Праваслаўя роднага краю: вопыт і методыка вывучэння”.
Арганізатары мерапрыемства – Нацыянальная бібліятэка Беларусі і Сінадальны аддзел рэлігійнай адукацыі і катэхізацыі Беларускай праваслаўнай царквы (БПЦ).
У працы семінара ўзялі ўдзел больш за 100 чалавек: кіраўнікі і спецыялісты публічных бібліятэк Міністэрства культуры Беларусі, бібліятэк устаноў адукацыі, царкоўных бібліятэк, бібліятэк іншых міністэрстваў і ведамстваў, выкладчыкі ўстаноў сярэдняй агульнай адукацыі, краязнаўцы, святары і іншыя прадстаўнікі структур БПЦ.
Ключавой тэмай абмеркавання стала стварэнне электронных рэсурсаў па царкоўным краязнаўстве. Асноўная частка дакладчыкаў падзялілася вопытам па вывучэнні святынь роднага краю: методыкай збору звестак, тэхналогіяй стварэння баз даных і інтэрактыўных рэсурсаў для дзяцей і падлеткаў, рэалізацыяй сумесных праграм і праектаў з замежнымі партнёрамі, арганізацыяй экскурсій і іншых мерапрыемстваў на аснове сабраных матэрыялаў. Усімі ўдзельнікамі семінара была адзначана эфектыўнасць сумеснай дзейнасці бібліятэк, устаноў адукацыі і структур Беларускай праваслаўнай царквы ў гэтым кірунку.
Кіравалі працай рэспубліканскага семінара галоўны бібліятэкар навукова-даследчага аддзела бібліятэказнаўства Нацыянальнай бібліятэкі Беларусі Вольга Рынкевіч і загадчык сектара парафіяльных бібліятэк аддзела рэлігійнай адукацыі і катэхізацыі Гродзенскай епархіі протаіерэй Уладзімір Барысевіч.
Матэрыял падрыхтаваны навукова-даследчым аддзелам бібліятэказнаўства.
