Дасягнута пагадненне аб рэалізацыі праекта па стварэнні Інвентара рукапісаў з бібліятэкі Радзівілаў, якія сёння захоўваюцца ў бібліятэках Беларусі, Польшчы і Францыі.
Пагадненне было дасягнута па выніках пасяджэння Беларуска-польскай кансультатыўнай камісіі па справах культурнай спадчыны, якое прайшло ў Нацыянальнай бібліятэцы Польшчы ў Варшаве.
Як вядома, нясвіжскі кнігазбор Радзівілаў быў адным з найвялікшых і найбольш каштоўных ва Усходняй Еўропе. Сёння ўжо зроблена вельмі шмат для ўліку і захавання друкаваных кніг з бібліятэкі Радзівілаў, што было высока ацэнена Беларуска-польскай кансультатыўнай камісіяй па справах культурнай спадчыны.
Аднак рукапісная спадчына, надзвычай каштоўная і рэдкая, дагэтуль заставалася па-за ўвагай і сістэматычнымі даследаваннямі спецыялістаў. У некаторай меры вядомы асобныя рукапісы, якія захоўваюцца ў расійскіх зборах. Як, напрыклад, знакаміты Радзівілаўскі летапіс ці вядомыя Радзівілаўскія акты са збораў Расійскай нацыянальнай бібліятэкі. Аднак сістэматычны аналіз бібліятэчных збораў на прадмет наяўнасці рукапісаў з Радзівілаўскіх збораў яшчэ чакае сваёй рэалізацыі.
Як мяркуецца, ініцыятыва беларускіх і польскіх калег будзе падтрымана Міністэрствам культуры і нацыянальнай спадчыны Польшчы. Аднак ужо сёння дасягнута дамоўленасць дзвюх нацыянальных бібліятэк аб супольнай працы ў гэтым кірунку, што і было замацавана пратаколам Беларуска-польскай кансультатыўнай камісіі па справах культурнай спадчыны. Чакаецца, што ў 2016–2017 гг. будуць апрацаваны рукапісы, якія знаходзяцца ў зборах Беларусі, Польшчы і Францыі, пасля чаго праца можа быць працягнута з калекцыямі бібліятэк Расіі, Літвы, Украіны і іншых краін.
Пратакол падпісаны намеснікам дырэктара Нацыянальнай бібліятэкі Беларусі Алесем Сушай і намеснікам дырэктара Нацыянальнай бібліятэкі Польшчы Катажынай Сьляскай.
 |
 |
 |
На фота: абмеркаванне Праекта прадстаўнікамі Нацыянальнай бібліятэкі Беларусі, Нацыянальнай бібліятэкі Польшчы, Варшаўскага ўніверсітэта, Міністэрства культуры і нацыянальнай спадчыны Польшчы, Культурнага цэнтра Беларусі ў Варшаве; падпісанне пратакола.
