21–22 кастрычніка адбудзецца III Міжнародны кангрэс “Бібліятэка як феномен культуры”, арганізатарамі якога выступілі Міністэрства культуры Рэспублікі Беларусь і Нацыянальная бібліятэка Беларусі.
Тэма кангрэса 2015 г. – “Чытанне і інфармацыйная культура ў сучасным грамадстве”.
У мерапрыемстве, якое пройдзе ў Нацыянальнай бібліятэцы Беларусі, прымуць удзел больш як 450 дэлегатаў з розных краін блізкага і далёкага замежжа – вядучыя спецыялісты бібліятэк, навукова-даследчых арганізацый, адукацыйных устаноў, прадстаўнікі заканадаўчай сферы, распрацоўшчыкі і вытворцы праграмнага забеспячэння, тэхнічных сродкаў і інфармацыйнай прадукцыі.
На пленарным і секцыйных пасяджэннях плануецца абмеркаванне праблем чытання і інфармацыйнай граматнасці; сусветнай медыйнай прасторы і бяспекі інфармацыі; нарматыўнага прававога забеспячэння бібліятэчнай дзейнасці; пытанняў захавання і даследавання нацыянальнай і сусветнай кніжнай спадчыны; кірункаў і перспектыў навукова-даследчай дзейнасці бібліятэк і іншых актуальных пытанняў.
Акрамя пасяджэнняў секцый, у дні кангрэса будуць арганізаваны майстар-класы, круглыя сталы па пытаннях дзейнасці публічных цэнтраў прававой інфармацыі, функцыянавання зводнага электроннага каталога бібліятэк Беларусі, стварэння і вядзення Дзяржаўнага рэестра кніжных помнікаў Рэспублікі Беларусь, пройдуць выстаўкі і прэзентацыі інфармацыйных прадуктаў і паслуг.
У рамках кангрэса адбудзецца ўзнагароджанне пераможцаў I Рэспубліканскага конкурсу “Бібліятэка – цэнтр духоўна-маральнай асветы і выхавання”, заснавальнікам якога з’яўляецца Беларускі экзархат. Работы лаўрэатаў будуць прадстаўлены на выстаўцы, якая пройдзе ў рамках мерапрыемства.
На выставачнай пляцоўцы кангрэса будуць таксама прадстаўлены работы – пераможцы XXIII Рэспубліканскага конкурсу “Бібліятэка – асяродак нацыянальнай культуры”, які праводзіцца штогод сярод публічных бібліятэк Беларусі.
Вынікі работы III Міжнароднага кангрэса “Бібліятэка як феномен культуры” і прынятыя рашэнні будуць садзейнічаць наступнаму ўмацаванню міжнароднага супрацоўніцтва паміж установамі культуры, адукацыі, навукі і стануць значным укладам у развіццё чытання і распаўсюджванне інфармацыйнай культуры, умацаванне духоўна-маральных асноў нашага грамадства.