19 лістапада а 17-й гадзіне ў галерэі “Лабірынт” адбудзецца прэзентацыя выдання “Радзівілы. Альбом партрэтаў XVIII–XIX стагоддзяў”.
Мерапрыемства арганізавана выдавецтвам “Беларуская Энцыклапедыя імя Петруся Броўкі" сумесна з Нацыянальнай бібліятэкай Беларусі.
У мэтах адраджэння мастацка-маральных традыцый, памнажэння нацыянальна-культурнага здабытку нашай краіны выдавецтва “Беларуская Энцыклапедыя імя Петруся Броўкі” выпусціла кнігу “Радзівілы. Альбом партрэтаў XVIII–XIX стагоддзяў”, якая паўтарае альбом Радзівілаў XVIII стагоддзя – унікальны помнік беларускай культуры.
Выданне прадстаўніцкага класа ўключае ў сябе 169 старонак факсімільных чорна-белых партрэтных гравюр і малюнкаў з гістарычнымі каментарыямі. Матэрыялы для выдання перадалі замежныя партнёры – сям’я князёў Радзівілаў, Каралеўскі замак Варшавы, нацыянальныя музеі Кракава, Нацыянальны мастацкі музей Літвы. Арыгінал альбома, напісаны на латыні, захоўваецца ў Нацыянальным гістарычным архіве Беларусі. Гэтае ўнікальнае выданне адзінае з дзевяці вядомых падобнага роду.
Выданне альбома было вельмі складаным у тэхнічным плане, бо для яго была патрэбна адмысловая дарагая папера. У выніку была знойдзена спецыяльная акварэльная папера, набліжаная да паперы XVIII стагоддзя, – цёплая навобмацак, з вадзянымі знакамі. Менавіта на ёй надрукаваны партрэтныя гравюры.
У мерапрыемстве возьмуць удзел прадстаўнікі міністэрстваў, ведамстваў, дыпламатычнага корпуса, бібліятэк, музеяў, архіваў Рэспублікі Беларусь.
Тэлефон для даведак: 293-27-67.
