Вынікі II Мінскага міжнароднага фестывалю лічбавага мастацтва "Terra Nova"

18 лістапада ў Нацыянальнай бібліятэцы Беларусі адбылося пасяджэнне круглага стала па лічбавым мастацтве і ўрачыстае закрыццё II Мінскага міжнароднага фестывалю лічбавага мастацтва "Terra Nova".

Кампетэнтным журы былі падведзены вынікі конкурсу, які праводзіўся сярод аўтараў – удзельнікаў фестывалю. У час пасяджэння і былі абвешчаныя пераможцы. Узнагароджанне адбылося па наступных намінацыях: “Лічбавае фота”, “Камп’ютарная графіка”, “Музычны кліп”, “Відэаарт” , “Рэкламны ролік”, “Анімацыя”. Гран-пры фестывалю ў намінацыі “Камп’ютарная графіка” атрымаў Р. Грыкевічус (Літва). Дыпломамі I ступені ўзнагароджаны: у намінацыі “Лічбавае фота” – Вадзім Качан (Беларусь) і Ганна Бабіцкая (Беларусь), у намінацыі “Музычны кліп” – Алена Бірукова (Беларусь), у намінацыі “Відэаарт” – Яўген Сысоеў (Беларусь), у намінацыі “Рэкламны ролік” – Сяргей Варапаеў (Беларусь), у намінацыі “Анімацыя” – Міхась Тумеля (Беларусь), у намінацыі “Камп’ютарная графіка” – Ларыса Кулік (Беларусь), Е. Іванаўскас (Літва), Ала Няхайчык (Беларусь).

Цырымоніі закрыцця фестывалю папярэднічала правядзенне круглага стала, у рабоце якога ўзялі ўдзел члены журы і аргкамітэта фестывалю: старшыня журы, кінарэжысёр, заслужаны дзеяч мастацтваў Рэспублікі Беларусь, мастацкі кіраўнік Тэатра-студыі кінаакцёра Аляксандр Яфрэмаў; галоўны куратар фестывалю, загадчык аддзела галерэйна-выставачнай дзейнасці Нацыянальнай бібліятэкі Беларусі Фёдар Ястраб; дызайнер, выкладчык Беларускай дзяржаўнай акадэміі мастацтваў Аляксандр Шчэпетаў; фотамастак, член экспертнай камісіі Беларускага грамадскага аб’яднання “Фотамастацтва” Валерый Вядрэнка; рэжысёр-аніматар Аляксандр Ленкін.

Удзельнікі круглага стала абмеркавалі перспектывы развіцця лічбавага мастацтва, а таксама стратэгіі развіцця фестывалю "Terra Nova".