21 верасня а 17 гадзіне ў галерэі “Ракурс” адбудзецца прэзентацыя відэапраграмы Рафаэля Зарка і Уладзіміра Лявона пра сувязь архітэктуры, помнікаў і скульптуры.
У рамках прэзентацыі пройдзе паказ відэафільма Рафаэля Зарка “Rhombus Sectus” пра будынак Нацыянальнай бібліятэкі Беларусі.
Год таму французская здымачная група на чале з Рафаэлем Зарка, маладым французскім мастаком, наведала горад Мінск для таго, каб зняць відэаарт пра Нацыянальную бібліятэку Беларусі. Ідэя стварэння гэтага дакументальнага фільма ўзнікла дзякуючы незвычайнаму архітэктурнаму рашэнню будынка бібліятэкі. Ромбакубаактаэдр, у форме якога выканана бібліятэка, упершыню 500 гадоў назад вывеў легендарны да Вінчы для трактата па геаметрыі “Божая прапорцыя”. Пошукамі розных праяў гэтай геаметрычнай формы Рафаэль Зарка займаўся на працягу васьмі гадоў. Знайсці архітэктурную рэалізацыю ідэі Леанарда самы вядомы з майстроў сучаснага мастацтва Францыі змог толькі ў нашай краіне.
У Францыі прэм’ера фільма “Rhombus Sectus” адбылася ў леташнім верасні і ўжо атрымала цёплыя водгукі крытыкаў і шырокі рэзананс у прэсе. Сёлета Рафаэль Зарка і рэжысёр Уладзімір Лявон, які год таму адначасова здымаў фільм пра фільм, вяртаюцца ў Мінск, каб паказаць відэапраграму беларускаму гледачу.
У мерапрыемстве возьмуць удзел саветнік па супрацоўніцтве і культуры Пасольства Французскай Рэспублікі ў Рэспубліцы Беларусь Людовік Руае, супрацоўнікі Нацыянальнай бібліятэкі Беларусі, архітэктары і праекціроўшчыкі будынка бібліятэкі.
Тэлефоны для даведак: 293-28-60, 293-27-67.
Е-mail: pr@nlb.by
