12 верасня ў галерэі «Лабірынт» адбылася прэзентацыя серыі кніг Анатоля Бутэвіча «Сем цудаў Беларусі», якія вылучаны на атрыманне Дзяржаўнай прэміі Беларусі.
Мерапрыемства прайшло ў рамках Года кнігі.
З прывітальным словам на прэзентацыі выступілі намеснік міністра культуры Рэспублікі Беларусь Тадэвуш Стружэцкі; пісьменніца, перакладчыца, лаўрэат Дзяржаўнай прэміі Беларусі, спецыяльнай прэміі Прэзідэнта Рэспублікі Беларусь Раіса Баравікова; Пастаянны Паўнаважны прадстаўнік Украіны пры каардынацыйных інстытутах Саюза Незалежных Дзяржаў Іван Бунечка; старшыня грамадскага аб’яднання “Беларускі фонд культуры”, галоўны рэдактар “Краязнаўчай газеты” Уладзімір Гілеп; рэдактар дзіцячага беларускага часопіса “Вясёлка”, старшыня праўлення Беларускага дзіцячага фонду, член Нацыянальнай камісіі па правах дзіцяці, лаўрэат літаратурных прэмій Уладзімір Ліпскі; аўтар многіх кніг для дзяцей, гістарычнай прозы, у тым ліку серыі кніг “Сем цудаў Беларусі”, дзяржаўны дзеяч, пісьменнік, перакладчык, публіцыст і крытык Анатоль Бутэвіч.
Літаратурна-мастацкія выданні серыі “Сем цудаў Беларусі” зроблены на дакументальнай аснове. Дакладныя звесткі пра выдатныя помнікі архітэктуры, духоўныя здабыткі продкаў, знакавыя гістарычныя постаці, унітаваныя ў агульнаеўрапейскі кантэкст беларускія з’явы і падзеі прадстаўлены ў выглядзе пазнавальных і цікавых апаваданняў. Захапляльныя тэксты Анатоля Бутэвіча суправаджаюцца цудоўнымі ілюстрацыямі вядомага мастака Паўла Татарнікава.