26 снежня а 15-й гадзіне ў Круглай зале (2-гі паверх) адбудзецца цырымонія афіцыйнага запуску агульнанацыянальнага праекта па факсімільным перавыданні кніжнай спадчыны Францыска Скарыны.
Пад час мерапрыемства будзе падпісаны ў друк першы том поўнага збору прац беларускага і ўсходнееўрапейскага першадрукара.
Выдавецкі праект, ініцыятарамі і асноўнымі выканаўцамі якога сталі Белзнешэканомбанк і Нацыянальная бібліятэка Беларусі, разлічаны на перыяд 2013–2017 гг. і прымеркаваны да 500-годдзя айчыннага кнігадрукавання.
Шматтомнае факсімільнае выданне ўпершыню дазволіць сабраць поўны рэпертуар кніг, якія былі надрукаваны Францыскам Скарынам у Празе і Вільні. Факсімільнае выданне кніг беларускага першадрукара прадставіць каштоўны пласт культурнай спадчыны нашага народа і стане базавай крыніцай для гістарычных, філалагічных, культуралагічных і кнігазнаўчых даследаванняў.
Выпушчаныя выданні будуць перададзены ў навуковыя, навучальныя, культурныя, грамадскія арганізацыі Беларусі і замежных краін.
Тэлефон для даведак: (8 017) 293 27 56.
Е-mail: pr@nlb.by