7 жніўня а 16-й гадзіне ў галерэі “Лабірынт” (3-ці паверх) ладзіцца адкрыццё культурна-асветніцкага праекта “Перазвон стагоддзяў”, прымеркаванага да 100-годдзя з пачатку Першай сусветнай вайны.
Праект складаецца з трох тэматычных экспазіцый, якія падрыхтаваны Нацыянальнай бібліятэкай Беларусі, Пасольствам Злучаных Штатаў Амерыкі ў Рэспубліцы Беларусь і грамадскай арганізацыяй “Беларускі зялёны крыж”.
Выстаўка “Першая сусветная вайна ў літаграфіях Жана-Луі Фарэна” грунтуецца на калекцыі з фонду Нацыянальнай бібліятэкі Беларусі. Літаграфіі створаны ў 1914–1917 гг. Мастак вельмі дакладна перадае драматызм вялікай вайны.
Экспазіцыя “Першая сусветная вайна ў амерыканскім плакаце, літаратуры, кіно і музыцы” змяшчае рэпрадукцыі амерыканскіх плакатаў, створаных у гэты гістарычны перыяд, дыскі з калекцыяй музычных твораў тых часоў, літаратурныя творы і кінафільмы.
Выстаўка “Пераклічка стагоддзяў: Першая сусветная вайна і свет сёння” прадстаўляе грамадскасці графічныя работы, выкананыя як маладымі, так і вопытнымі мастакамі і педагогамі з Беларусі, Расіі і Украіны па матывах паэтычных і празаічных твораў вядомых пісьменнікаў, якія адлюстроўваюць тэму Першай сусветнай.
Акрамя таго, Нацыянальная бібліятэка Беларусі на інтэрнэт-партале падрыхтавала анлайнавы рэсурс, прысвечаны падзеям Першай сусветнай вайны, што адбываліся на тэрыторыі Беларусі. У яго аснове – матэрыялы з фондаў бібліятэкі: кнігі, часопісы, выяўленчыя дакументы 1914–1917 гг.
Экспазіцыі праекта дэманструюцца на 3-м паверсе бібліятэкі, у галерэях “Атрыум” і “Лабірынт”, да 10 верасня 2014 г.
Тэлефоны для даведак: (8 017) 293 27 56, 293 29 80.
Е-mail: pr@nlb.by
