З 1 па 31 жніўня ў зале выяўленчых і відэаматэрыялаў (пам. 307) праходзіць выстаўка “Геніяльны мастак”, прысвечаная 170-годдзю з дня нараджэння рускага жывапісца і графіка, педагога І.Я. Рэпіна (1844–1930).
Сваім мастацтвам выдатны майстар эпохі Ілья Яфімавіч Рэпін шмат у чым вызначыў шляхі развіцця рускага жывапісу, а таксама сфарміраваў пэўную мастацкую традыцыю. У творчасці ён аб’яднаў усё самае лепшае, што было ў рускім рэалізме. Мастак быў партрэтыстам, майстрам бытавых карцін (“Бурлакі на Волзе” (1870–1873), “Хросны ход у Курскай губерні” (1881–1883) і інш.), гістарычным жывапісцам (“Запарожцы пішуць ліст турэцкаму султану” (1878–1891), “Іван Грозны і яго сын Іван 16 лістапада 1581 года” (1885) і інш.). Карціна “Бурлакі на Волзе”, з якой Рэпін дэбютаваў перад шырокай публікай, адразу зрабіла яго вядомым сярод рускіх мастакоў.
Партрэт стаў упадабаным жанрам мастака, творца напісаў галерэю партрэтаў дзеячаў рускай культуры – М. Мусаргскага (1881), П. Траццякова (1883), Л. Талстога (1887) і інш. Гэтыя работы раскрылі яркія вобразы таленавітых сучаснікаў.
Нягледзячы на неверагодны талент і надзвычайную стараннасць у працы, Ілья Яфімавіч, у сілу сваёй сціпласці, лічыў уласны поспех проста шанцаваннем. Яго работы палюбіліся як сучаснікам мастака, так і іх нашчадкам. Карціны майстра сталі адлюстраваннем яго часу, гістарычных эпох.
На выстаўцы прадстаўлены кнігі, альбомы, рэпрадукцыі, паштоўкі, а таксама шматлікія артыкулы са зборнікаў і перыядычных выданняў. Сярод экспанатаў – кніга І. Рэпіна “Далёкае блізкае” (1986), якая вытрымала не адно выданне і добра знаёмая чытачу. Акрамя ўспамінаў мастака, у ёй надзвычай цікава асветлены праблемы сучаснага яму рускага мастацтва і культуры.
Экспазіцыя разлічана на ўсе катэгорыі чытачоў, якія цікавяцца творчасцю І. Рэпіна.
Кантактны тэлефон: (8 017) 293 27 58.