1 сакавіка а 17-й гадзіне ў галерэі "Лабірынт" адбудзецца адкрыццё выстаўкі "Патрыярх беларускай сатыры", прымеркаванай да 115-годдзя з дня нараджэння народнага пісьменніка Беларусі Кандрата Кандратавіча Крапівы (1896–1991).
Арганізатары мерапрыемства – Нацыянальная бібліятэка Беларусі і Дзяржаўны музей гісторыі беларускай літаратуры.
Літаратурна-дакументальная выстаўка "Патрыярх беларускай сатыры" раскрывае шматграннасць сатырычнага таленту класіка беларускай літаратуры, паэта-сатырыка, празаіка, драматурга, навукоўца-лінгвіста, аднаго з самых вядомых прадстаўнікоў нацыянальнай культуры – Кандрата Крапівы.
На выстаўцы будуць прадстаўлены каштоўныя матэрыялы з архіва пісьменніка, якія захоўваюцца ў фондах Дзяржаўнага музея гісторыі беларускай літаратуры: рукапісы, лісты, фатаграфіі розных гадоў, дакументы, сувеніры, асабістыя рэчы, кнігі.
Нацыянальная бібліятэка Беларусі прадставіць выстаўку-прагляд твораў і дакументаў Кандрата Крапівы са сваіх фондаў.
У мерапрыемстве возьмуць удзел дырэктар Нацыянальнай бібліятэкі Беларусі Раман Матульскі, дырэктар Дзяржаўнага музея гісторыі беларускай літаратуры Лідзія Макарэвіч, беларуская пісьменніца і літаратуразнавец Лідзія Арабей, галоўны дырэктар замежнага вяшчання беларускага радыё Навум Гальпяровіч, сакратар упраўлення Саюза пісьменнікаў Беларусі, паэт Міхась Пазнякоў, драматург Аляксей Дудараў, акцёр Генадзь Аўсяннікаў, родныя пісьменніка, даследчыкі і аматары творчасці Кандрата Крапівы, яго сябры і знаёмыя.
Выстаўка будзе доўжыцца да 1 мая ў музеі кнігі Нацыянальнай бібліятэкі Беларусі.
Тэлефоны для даведак: 293-27-67, 334-56-21.
Е-mail: pr@nlb.by
