6 снежня ў Нацыянальнай бібліятэцы Беларусі ў рамках IV Усебеларускага народнага сходу адбылося пасяджэнне секцыі “Культура, спорт, ахова здароўя, СМІ”.
IV Усебеларускі народны сход праходзіць у Рэспубліцы Беларусь з 6 па 7 снежня. Галоўныя пытанні, якія выносяцца на яго абмеркаванне, – вынікі Праграмы сацыяльна-эканамічнага развіцця Беларусі на 2006–2010 гг. і аналагічная Праграма на 2011–2015 гг.
Дэлегатамі IV Усебеларускага сходу сталі 2,5 тыс. чалавек. Сярод іх – прадстаўнікі ўсіх слаёў беларускага грамадства: дэпутаты Нацыянальнага сходу Беларусі, кіраўнікі рэспубліканскіх і мясцовых органаў дзяржкіравання, прамыслоўцы, энергетыкі, работнікі будаўнічай галіны, ЖКГ, транспарту, сувязі, гандлю, культуры, спорту, аховы здароўя, СМІ, навукі, адукацыі, сілавых структур, бізнесу, фінансавых і банкаўскіх структур, студэнцкая моладзь, ветэранскія і іншыя грамадскія аб’яднанні, замежныя госці.
У першы дзень работы форуму адбылося пасяджэнне секцый. Дэлегаты абмеркавалі пытанні пэўных сфер: прамысловасці, сістэмы ЖКГ, аграпрамысловага комплексу, адукацыі, аховы здароўя і інш.
У працы секцыі “Культура, спорт, ахова здароўя, СМІ” ўзялі ўдзел больш за 170 дэлегатаў. Сярод іх – старшыня Канстытуцыйнага суда Рэспублікі Беларусь Пётр Міклашэвіч, намеснік міністра культуры Рэспублікі Беларусь Тадэвуш Стружэцкі, першы намеснік міністра інфармацыі Рэспублікі Беларусь Лілія Ананіч, дырэктар Нацыянальнай бібліятэкі Беларусі Раман Матульскі, дырэктар Беларускага дзяржаўнага музея гісторыі Вялікай Айчыннай вайны Сяргей Азаронак, начальнік кіравання арганізацыі медыцынскай дапамогі Міністэрства аховы здароўя Іван Рыжко і інш.
