20 студзеня ў Нацыянальнай бібліятэцы Беларусі адбылося пасяджэнне Каардынацыйнага савета сістэмы карпаратыўнай каталагізацыі і вядзення Зводнага электроннага каталога бібліятэк Беларусі (ЗЭК ББ).
На пасяджэнні прысутнічалі спецыялісты Цэнтральнай навуковай бібліятэкі імя Я. Коласа НАН Беларусі, Рэспубліканскай навукова-тэхнічнай бібліятэкі, Нацыянальнай бібліятэкі Беларусі.
У адпаведнасці з праграмай пасяджэння былі абмеркаваны асаблівасці карпаратыўнай работы ў 2011 г., удзел прадстаўнікоў арганізацый у працы тэхналагічнага камітэта; разгледжаны пытанні па каталагізацыі кніжнай прадукцыі, аўтарэфератаў дысертацый, дысертацый; рэзультаты пакетнай загрузкі масіваў ізадакументаў, цяжкасці, якія ўзнікаюць падчас сэнсавай апрацоўкі гэтых відаў дакументаў; асаблівасці фарміравання аўтарытэтных запісаў у ЗЭК ББ, цяжкасці каталагізацыі выяўленчых дакументаў; алгарытмы працы з дублетнымі бібліяграфічнымі запісамі.
Прысутныя былі праінфармаваны аб новай рэдакцыі дакумента "Руководство по составлению в формате BELMARC/Authorities авторитетных/нормативных записей на имена организаций" і магчымасці доступу да яго электроннай версіі.
Унесены прапановы аб змене арганізацыйнай структуры кіравання сістэмы карпаратыўнай каталагізацыі і ЗЭК ББ.
