З 23 студзеня па 23 лютага ў Прэзідэнцкай бібліятэцы Рэспублікі Беларусь арганізавана кніжная выстаўка “910 гадоў з дня нараджэння Еўфрасінні Полацкай – полацкай князёўны, асветніцы, беларускай святой”.
Еўфрасіння Полацкая – прадстаўніца хрысціянскага культурна-асветніцкага руху ў Полацкім княстве XII ст. Першая жанчына гэтага перыяду, далучаная да ліку святых. Нарадзілася ў Полацку. Дачка полацкага князя Святаслава-Георгія, малодшага сына князя Усяслава Брачыславіча. Выбрала шлях служэння Богу і народу. У манастыры перапісвала і распаўсюджвала кнігі Бібліі, адкрыла школы для дзяцей, пабудавала дзве царквы – Спаса і Святой Багародзіцы – у Полацку. Па яе загадзе майстрам Лазарам Богшам быў зроблены крыж – выдатны помнік прыкладнога мастацтва старажытнасці, названы пазней крыжам Еўфрасінні Полацкай.
На выстаўцы, размешчанай каля залы абанемента, можна азнаёміцца з такімі выданнямі, прысвечанымі жыццю і дзейнасці беларускай асветніцы, як “Преподобная Евфросиния Полоцкая”, “Слава тебе, святой свет преподобной Евфросинии Полоцкой” Л. Біруковай, “Святая Еўфрасіння-Прадслава, патронка Беларусі: нарыс жыцця і дзейнасці” Л. Гарошкі, “Святая Еўфрасіння, альбо Адкуль ёсць, пайшла Полацкая зямля” А. Марціновіча і многімі іншымі.
Усе выданні можна заказаць праз электронны каталог у Інтэрнэце на сайце Прэзідэнцкай бібліятэкі Рэспублікі Беларусь (www.preslib.org.by) або непасрэдна ў самой бібліятэцы.
Выстаўка бясплатная, працуе штодня (акрамя суботы і нядзелі) з 10.00 да 18.00 без перапынку на абед. Для наведвання выстаўкі неабходны чытацкі білет Прэзідэнцкай бібліятэкі Рэспублікі Беларусь або пашпарт.
Адрас Прэзідэнцкай бібліятэкі Рэспублікі Беларусь:
г. Мінск, вул. Савецкая, 11 (Дом урада, правае крыло).
Тэлефон: 222-42-90.