20 лістапада ў Нацыянальнай бібліятэцы Беларусі прайшла цырымонія ўзнагароджання пераможцаў і лаўрэатаў раённага літаратурнага конкурсу “Дэбют”.
У Першамайскім раёне сталіцы літаратурны конкурс праводзіцца штогод. На працягу 18 гадоў “Дэбют” адкрывае новыя таленты і падтрымлівае людзей самых розных узростаў і прафесій на іх літаратурнай ніве.
Сёлета на суд журы паступіла рэкордная колькасць работ – больш за 350 вершаў, апавяданняў, эсэ, п'ес. Творы размеркаваны па трох тэмах – “Жыцця майго цудоўны край”, “Я ганаруся табой, мой Першамайскі раён!” і “Пачынаецца ўсё з любові...”.
У конкурсе ўдзельнічалі школьнікі, студэнты, кадэты, педагогі, інжынеры, рабочыя, кіраўнікі прадпрыемстваў, пенсіянеры і іншыя жыхары Першамайскага раёна.
Пераможцамі і прызёрамі конкурсу журы выбрала 85 чалавек. Самаму малодшаму з іх 8 гадоў, старэйшаму – 83 гады.
Арганізатарамі цырымоніі ўзнагароджання выступілі Нацыянальная бібліятэка Беларусі і Адміністрацыя Першамайскага раёна г. Мінска.
Матэрыял падрыхтаваны аддзелам сувязей з грамадскасцю.