Музей кнігі прапаноўвае новую тэматычную экскурсію “Рэлігійная кніга”. Наведвальнікі пазнаёмяцца з рэлігійнай кнігай ва ўсёй яе разнастайнасці.
З мэтай павышэння ролі кнігі і чытання ў сучасным грамадстве 2012 год абвешчаны Годам кнігі. У сувязі з гэтым у музеі кнігі плануецца ўвядзенне новых тэматычных экскурсій для наведвальнікаў. Першая з іх – "Рэлігійная кніга"
У экспазіцыі прадстаўлены рукапісныя кнігі: Евангеллі XVI–XVIІІ стст., упрыгожаныя застаўкамі і маляўнічымі ініцыяламі; зборнікі царкоўных песнапенняў; стараверскія рукапісныя помнікі, у тым ліку пеўчыя рукапісы з крукавай натацыяй.
Першыя кнігі, выдадзеныя ўсходнеславянскімі першадрукарамі, таксама былі рэлігійнага зместу. Францыск Скарына ў Празе ў 1517–1519 гг. выпускае “Псалтирь” і 22 кнігі Старога Запавету пад агульнай назвай “Бивлиа руска”. Нацыянальная бібліятэка Беларусі з’яўляецца адзінай у нашай краіне ўладальніцай арыгінальных кніг выдаўца. Наведвальнікі ўбачаць кнігі Скарыны, а таксама яго паслядоўнікаў – Івана Фёдарава і Пятра Мсціслаўца.З беларускіх друкарняў прадстаўлены віленская, брэсцкая, куцеінская, магілёўская, супрасльская, пінская і іншыя. Дэманструюцца выдадзеныя ў Беларусі старадрукаваныя кнігі розных рэлігійных канфесій – праваслаўнай, каталіцкай, уніяцкай, пратэстанцкай і стараверскай. Такая разнастайнасць сведчыць пра поліканфесіянальнасць беларускай культуры.
Раздзел “Кніжныя пераплёты” прадставіць наведвальнікам музея багата аздобленыя напрастольныя Евангеллі, рэдкае выданне “Око церковное” (1610) і іншыя царкоўныя кнігі, якія прывабліваюць увагу сваім мастацкім афармленнем.
Такім чынам, экскурсія ў музеі кнігі дапаможа наведвальнікам шырэй пазнаёміцца з рэлігійнымі кнігамі розных канфесій, з асаблівасцямі мастацкага афармлення рэлігійнай кнігі, а таксама больш даведацца пра традыцыі і рэлігійныя вераванні свайго народа.
Экскурсіі ў музеі кнігі праводзяцца штодзень з 10.00 да 17.00. на платнай аснове. Запіс на экскурсію папярэдні па тэл. 293-27-22 (сектар музейнай дзейнасці).
Кантактны тэлефон: 293-25-85 (музей кнігі).
