Сёння сумная дата ў календары памятных дат Беларусі – дзень Хатынскай трагедыі, якая адбылася 81 год таму. Кожны раз мы з асабістым болем перажываем гэтыя падзеі, калі фашысцкія карнікі жыўцом спалілі і расстралялі амаль усіх жыхароў вёскі Хатынь.
22 сакавіка 1943 года карны атрад знішчыў 149 мірных вяскоўцаў, у тым ліку 75 дзяцей, якія нічога не ведалі ні пра атаку партызан на аўтакалону, ні пра тое, што быў забіты нямецкі афіцэр, але ні ў чым не вінаватым людзям ужо быў вынесены прысуд.
У студзені 1966 года было прынята рашэнне аб стварэнні мемарыяльнага комплексу “Хатынь”, адкрыццё якога адбылося 5 ліпеня 1969 года. Гэта месца стала сімвалам усіх спаленых вёсак Беларусі, па-зверску знішчаных нямецка-фашысцкімі захопнікамі ў гады Вялікай Айчыннай вайны. Гэты мемарыял – даніна памяці ўсім беларусам, якія загінулі падчас гэтых падзей. Мемарыяльны комплекс “Хатынь” – гісторыка-культурная каштоўнасць Рэспублікі Беларусь, уключаная ў Дзяржаўны спіс гісторыка-культурнай спадчыны.
У 2023 годзе да 80-годдзя Хатынскай трагедыі Нацыянальнай бібліятэкай Беларусі сумесна з Нацыянальным архівам Рэспублікі Беларусь была падрыхтавана кніжна-дакументальная выстаўка “Памяць спаленых вёсак”, якая дазваляе ўзгадаць трагічныя абставіны гібелі жыхароў вёскі Хатынь, што шматгалосым рэхам адгукаецца ў лёсе тысяч іншых спаленых беларускіх вёсак.
Кожны год тысячы наведвальнікаў з розных краін прыязджаюць у Хатынь, каб ушанаваць памяць нявінных ахвяр той жудаснай трагедыі.
Фотаздымкі з фондаў Нацыянальнай бібліятэкі Беларусі; фота на афішы з сайта “СБ – Беларусь сегодня”.
Матэрыял падрыхтаваны інфармацыйна-аналітычным аддзелам.