Нацыянальная бібліятэка Беларусі ўзяла ўдзел у II Міжнароднай навукова-практычнай канферэнцыі “Кніга і чытанне ў лічбавую эпоху”, якая адбылася 20–23 чэрвеня ў Бішкеку (Кыргызская Рэспубліка).
Асноўнай мэтай мерапрыемства з’яўлялася павышэнне і ўмацаванне ў грамадскай свядомасці важнасці і актуальнасці праблемы падтрымкі і развіцця чытання ў дзяржавах – удзельніцах СНД.
Загадчыца аддзела міжбібліятэчнага абанемента і дастаўкі дакументаў Вольга Скалабан выступіла з прэзентацыяй і дакладам “Развіццё віртуальных сэрвісаў Нацыянальнай бібліятэкі Беларусі ў перыяд пандэміі (на прыкладзе электроннай дастаўкі дакументаў)”, падзялілася вопытам працы бібліятэкі ва ўмовах распаўсюджвання каранавіруснай інфекцыі.
На канферэнцыі традыцыйна абмяркоўваліся актуальныя праблемы і перспектывы палітыкі і дзейнасці па падтрымцы і развіцці чытання, якая праводзіцца ў кожнай краіне СНД, роля кнігі і чытання ў вырашэнні сацыяльна значных праблем, шляхі і сродкі павышэння сацыяльнай эфектыўнасці праграм і праектаў па папулярызацыі чытання, што рэалізуюцца ўстановамі адукацыі, бібліятэкамі, выдавецтвамі, арганізацыямі кніжнага гандлю, СМІ, а таксама развіццё міждзяржаўнага супрацоўніцтва ў сферы папулярызацыі чытання і медыйна-інфармацыйнай пісьменнасці.
У мерапрыемстве ўзялі ўдзел кіраўнікі найбуйнейшых бібліятэк, выдавецтваў, прадпрыемстваў кніжнага гандлю, органаў улады і ўстаноў у сферы навукі і адукацыі, мастацтва і культуры, камунікацыі і інфармацыі, грамадскіх арганізацый і бізнесу з Азербайджана, Арменіі, Беларусі, Казахстана, Кыргызстана, Малдовы, Расіі, Таджыкістана, Туркменістана, Узбекістана і Украіны.
Арганізатарамі канферэнцыі выступілі Міжрэгіянальны цэнтр бібліятэчнага супрацоўніцтва, Расійскі камітэт праграмы ЮНЕСКА “Інфармацыя для ўсіх” і Нацыянальная бібліятэка Кыргызскай Рэспублікі імя А. Асмонава пры падтрымцы Міждзяржаўнага фонду гуманітарнага супрацоўніцтва дзяржаў – удзельніц СНД і Міністэрства культуры і турызму Кыргызскай Рэспублікі.
Матэрыял пададзены аддзелам сувязей з грамадскасцю.
