25 ліпеня ў бібліятэцы прайшла прэс-канферэнцыя, прысвечаная перадачы ў дар “алмазу ведаў” 3 камплектаў і 5 сертыфікатаў на права доступу да электроннага збору кніг “Бібліятэка Сбербанка”.
Старшыня праўлення ААТ “БПС-Сбербанк” Ігар Мяркулаў прадставіў унікальны праект міжнароднай Групы Сбербанка – карпаратыўную калекцыю кніг “Бібліятэка Сбербанка”.
Штогод фінансавая арганізацыя выдае па 12 кніг замежных аўтараў, і сёння бібліятэка ўстановы налічвае 81 кнігу, якія аб'яднаны ідэяй дапамагчы самаўдасканаленню і раскрыццю ўнутранага патэнцыялу асобы. Пачатак калекцыі паклала кніга Стывена Кові “Семь навыков высокоэффективных людей”, названая ў 2011 годзе часопісам Time адной з 25 найбольш уплывовых кніг свету па бізнесе. Перададзеныя бібліятэцы выданні – квінтэсенцыя простых правілаў і законаў паводзін, фарміравання характару, развіццё сваёй справы, узаемаадносін з блізкімі і калегамі па працы.
“У нашай карпаратыўнай “ чытальнай зале” сабраны сусветны практычны бізнес-вопыт. Прадстаўленая дзелавая літаратура – скарбніца інавацыйных рашэнняў як для супрацоўнікаў банка, так і для шырокага кола чытачоў, якія адкрыты новым поглядам на звыклыя рэчы. Мы шчыра верым у тое, што галоўная каштоўнасць кніг – у іх здольнасці змяніць жыццё чалавека, напоўніўшы яго свежымі ідэямі і сэнсам”, – расказаў кіраўнік банка і парэкамендаваў да прачытання кнігу Майкла Ташмена і Чарльза О'Райлі “Победить с помощью инноваций”, адзначыўшы яе каштоўнасць як практычнага кіраўніцтва па арганізацыйных зменам і абнаўленням, калі здольнасць вучыцца, нават шляхам спроб і памылак, становіцца важным элементам інавацыйнага развіцця.
Прымаючы дар, першы намеснік дырэктара Нацыянальнай бібліятэкі Беларусі Алена Далгаполава адзначыла: “Сёння “Бібліятэка Сбербанка” здабыла новы дом. Бібліяграфічная інфармацыя пра выданні будзе аператыўна адлюстравана ў электронным каталогу Нацыянальнай бібліятэкі Беларусі і зводным электронным каталогу бібліятэк Беларусі. Чытачам будзе прадастаўлена магчымасць непасрэдна азнаёміцца з выданнямі на выстаўцы новых паступленняў, а ў далейшым кожны жадаючы зможа атрымаць іх для больш глыбокага вывучэння ў чытальных залах. Выданні будуць цікавыя шырокаму колу карыстальнікаў, якія цікавяцца кнігамі па лідэрству, развіццю асобы, менеджменце, сучасных тэхналогіях”.
У завяршэнне мерапрыемства Алена Далгаполава ўручыла чытацкі білет Ігару Мяркулаву, падзякаваўшы БПС-Сбербанк за шчодры дар і выказаўшы надзею на далейшае плённае супрацоўніцтва і пашырэнне ўзаемадзеяння ў сферы культуры.
Таксама для кіраўніка банка была праведзена экскурсія, падчас якой ганаровы госць пазнаёміўся з гісторыяй бібліятэкі і архітэктурнымі асаблівасцямі будынка.