15 верасня ў галоўнай бібліятэцы краіны адбылося ўрачыстае адкрыццё IX Міжнароднага кангрэса “Бібліятэка як феномен культуры”, прысвечанага 100-годдзю Нацыянальнай бібліятэкі Беларусі.
Адкрыла мерапрыемства генеральны дырэктар Нацыянальнай бібліятэкі Беларусі Аксана Кніжнікава. З прывітальнымі словамі выступілі намеснік міністра культуры Рэспублікі Беларусь Сяргей Саракач, галоўны вучоны сакратар Нацыянальнай акадэміі навук Васіль Гурскі, генеральны дырэктар Расійскай дзяржаўнай бібліятэкі, прэзідэнт некамерцыйнага партнёрства “Бібліятэчная асамблея Еўразіі” Вадзім Дуда, в.а. генеральнага дырэктара Прэзідэнцкай бібліятэкі імя Б.М. Ельцына Юрый Носаў, дырэктар Фундаментальнай бібліятэкі Беларускага дзяржаўнага ўніверсітэта, старшыня Савета грамадскага аб’яднання “Беларуская бібліятэчная асацыяцыя” Уладзімір Кулажэнка, прарэктар па навуковай рабоце Беларускага дзяржаўнага ўніверсітэта культуры і мастацтваў Алена Корсакава.
Прэзідэнт Міжнароднай федэрацыі бібліятэчных асацыяцый і ўстаноў (IFLA) Барбара Лізон, дырэктар Нацыянальнай бібліятэкі Кітая Ксён Хуамінг і выканаўчы дырэктар Нацыянальнай бібліятэкі Катара Тан Х’юісм накіравалі відэазвароты, у якіх цёпла павіншавалі калектыў Нацыянальнай бібліятэкі Беларусі са знамянальнай датай і пажадалі далейшага росквіту, новых праектаў, перамог і здзяйсненняў.
На пленарным пасяджэнні кіраўнікі і аўтарытэтныя спецыялісты найбуйнейшых бібліятэк, архіваў, музеяў, выдавецтваў, вядучых навукова-даследчых арганізацый і адукацыйных устаноў, вытворцы праграмнага забеспячэння, тэхнічных сродкаў, інфармацыйнай прадукцыі і прамысловага абсталявання для бібліятэк абмяркоўваюць тэму кангрэса 2022 года – “Лічбавая трансфармацыя бібліятэк: пераемнасць і вектар развіцця”. Усяго ў працы форуму бяруць удзел больш за 450 дэлегатаў з Беларусі і краін блізкага замежжа – Азербайджана, Казахстана, Кыргызстана, Расіі, Таджыкістана, Узбекістана.
У праграме першага дня секцыйныя пасяджэнні, выстава выдавецкай прадукцыі, электронных інфармацыйных рэсурсаў і сэрвісаў, XXVI Агульны сход некамерцыйнага партнёрства “Бібліятэчная асамблея Еўразіі”, урачыстая цырымонія ўзнагароджання работнікаў міністэрствамі і ведамствамі, прысвечаная 100-годдзю Нацыянальнай бібліятэкі Беларусі, уручэнне ўзнагарод XXX Рэспубліканскага конкурсу “Бібліятэка – асяродак нацыянальнай культуры”, цырымонія гашэння дзяржаўнага знака паштовай аплаты Рэспублікі Беларусь “100 гадоў Нацыянальнай бібліятэцы Беларусі”, урачыстае пасяджэнне і канцэртная праграма.
16 верасня ў рамках кангрэса адбудуцца секцыйныя пасяджэнні і семінар “Пазабюджэтная дзейнасць у сацыякультурнай сферы”, дыскусійная пляцоўка “Электронныя рэсурсы: адкрыты дыялог бібліятэк і выдаўцоў”.
Арганізатары мерапрыемства – Міністэрства культуры Рэспублікі Беларусь, некамерцыйнае партнёрства “Бібліятэчная асамблея Еўразіі”, Міждзяржаўны фонд гуманітарнага супрацоўніцтва дзяржаў – удзельніц СНД, Нацыянальная бібліятэка Беларусі.
Далучайцеся да трансляцыі.
Матэрыял пададзены аддзелам сувязей з грамадскасцю.