З 24 па 28 кастрычніка ў г. Ерэване (Рэспубліка Арменія) адбыўся семінар “Абліччы памяці: найноўшыя тэхналогіі захавання і ўзнаўлення рукапіснай і друкаванай спадчыны”.
Семінар быў арганізаваны Навукова-даследчым інстытутам старажытных рукапісаў імя Месропа Маштоца “Матэнадаран” пры падтрымцы Міністэрства культуры Рэспублікі Арменія і Міждзяржаўнага фонду гуманітарнага супрацоўніцтва дзяржаў – удзельніц СНД.
У семінары ўдзельнічалі рэстаўратары, захавальнікі фондаў, работнікі музеяў, бібліятэк, архівісты, спецыялісты ў галіне высокіх тэхналогій з краін СНД, Балтыі і шэрагу еўрапейскіх краін. У рабоце семінара ўзяла ўдзел супрацоўніца аддзела рэстаўрацыі і кансервацыі бібліятэчных дакументаў Нацыянальнай бібліятэкі Беларусі Палтаран Л.А., якая выступіла з дакладам “Механізаваны метад рэстаўрацыі, які прымяняецца ў Нацыянальнай бібліятэцы Беларусі”.
Семінар стаў своеасаблівым курсам па ўдасканаленні маладых спецыялістаў, даў магчымасць абмяняцца вопытам і ведамі ў сферы найноўшых методык і тэхналогій, з прыцягненнем унікальнага рукапіснага і друкаванага збору Матэнадарана.
Падчас семінара спецыялісты абмеркавалі агульныя праблемы, шляхі і спосабы іх пераадолення, падзяліліся дасягненнямі і вопытам. Шмат увагі было адведзена практычнай частцы: у рамках семінара праводзіліся майстар-класы і круглыя сталы.