8 лістапада а 17-й гадзіне ў галерэі “Лабірынт” адбудзецца адкрыццё рэспубліканскага мультыпраекта “Вянок Максіму”, прысвечанага 120-годдзю з дня нараджэння Максіма Багдановіча.
Максім Багдановіч – недасягальная велічыня на небасхіле беларускай паэзіі, тонкі лірык, майстар еўрапейскага ўзроўню, паэт, чый трагічны лёс абарваўся ў 26 гадоў.
Творчасць Багдановіча – гэта свет прыгажосці, гармоніі, лірыка пакутлівых разважанняў і трапяткіх пачуццяў, якая натхніла і працягвае натхняць шматлікіх паэтаў, мастакоў і музыкаў. На жаль, значэнне асобы Багдановіча яшчэ не да канца асэнсавана сучаснікамі, таму гэты праект – спроба рознабакова праліць святло на таямніцу паэта, яго жыццё і творчасць.
Мультыпраект “Вянок Максіму” ўключае:
- рэспубліканскую мастацкую выстаўку;
- фотабіяграфічную выстаўку “Максім Багдановіч”;
- юбілейную кніжную выстаўку “І зорка гарыць, і не вяне вянок...”;
- прэзентацыю мультымедыйнага выдання “Паэт красы і гармоніі”;
- прэзентацыю кнігі “Максім Багдановіч” выдавецтва “Беларуская Энцыклапедыя імя П. Броўкі”;
- выстаўку “Я не самотны, я кнігу маю…” ў музеі кнігі Нацыянальнай бібліятэкі Беларусі (экспануецца прыжыццёвы зборнік Максіма Багдановіча “Вянок” (Вільня, Друкарня Марціна Кухты, 1913) з аўтографам паэта).
Мультыпраект “Вянок Максіму” будзе доўжыцца да 9 снежня 2011 г.
Тэлефоны для даведак: 293-28-33, 293-27-67.
Е-mail: pr@nlb.by
