15 верасня ў Нацыянальнай бібліятэцы Беларусі пройдуць урачыстыя мерапрыемствы, прысвечаныя Дню бібліятэк.
Традыцыйна свята адкрые ўрачыстасць, прысвечаная Дню бібліятэк, якая адбудзецца на плошчы перад Нацыянальнай бібліятэкай Беларусі каля помніка Ф. Скарыне а 12-й гадзіне.
У мерапрыемстве возьмуць удзел прадстаўнікі дзяржаўных органаў у сферы культуры і бібліятэчнай справы, прадстаўнікі бібліятэчнай грамадскасці з розных рэгіёнаў Беларусі. У праграме свята запланаваны тэатралізаваныя і харэаграфічныя нумары.
Да Дня бібліятэк прымеркавана адкрыццё выстаўкі “Сам сабе мастак”. Гэта сумесны праект Беларускай Бібліятэчнай Асацыяцыі і Нацыянальнай бібліятэкі Беларусі. Выстаўка падрыхтавана па выніках конкурсу, які праводзіўся сярод супрацоўнікаў бібліятэк усіх рэгіёнаў краіны.
У экспазіцыю ўвайшло каля 70 работ, выкананых ў розных відах мастацтва – жывапісе, скульптуры, ткацтве, вышыўцы, дызайне адзежы, – таленавітымі і творчымі бібліятэкарамі.
Кампетэнтным журы былі адабраны лепшыя работы ў некалькіх намінацыях, пераможцы якіх атрымаюць узнагароды. Адкрыццё выстаўкі “Сам сабе мастак” адбудзецца а 13-й гадзіне ў галерэі “Ракурс” (уваход правы бакавы).
Выстаўка будзе доўжыцца да 14 кастрычніка 2011 г.
Тэлефоны для даведак: 293-28-23, 293-27-67.
Е-mail: pr@nlb.by