Навагоднія святы – час цудаў і прыемных сюрпрызаў, калі кожны імкнецца падзяліцца радасцю і душэўным цяплом з блізкім. Нацыянальная бібліятэка Беларусі традыцыйна праводзіць дабрачынныя экскурсіі і іншыя сацыякультурныя мерапрыемствы.
У рамках рэспубліканскай дабрачыннай акцыі “Нашы дзеці” бібліятэку наведалі навучэнцы Барысаўскага, Маладзечанскага, Пухавіцкага, Смалявіцкага, Клецкага, Нясвіжскага раёнаў Мінскай вобласці. Яны сталі ўдзельнікамі абласной акцыі “Новы год з бібліятэкай”, якая праходзіла з 20 снежня 2019 года па 9 студзеня 2020 года.
А напярэдадні Старога Новага года на экскурсіі па Нацыянальнай бібліятэцы пабывалі людзі з парушэннямі зроку – работнікі Навагрудскага філіяла ўнітарнага прадпрыемства “Фільтр” ГА “БелТІЗ” – і іх дзеці. Сем’і змаглі правесці вольны час разам, здзейсніць шпацыр па ўнікальным будынку, даведацца пра тыя паслугі, якія прадастаўляе бібліятэка чытачам з парушэннямі зроку і, вядома, падняцца на аглядную пляцоўку.
Спадзяёмся, што прыемныя ўспаміны пра навагоднія святы, праведзеныя ў НББ, застануцца ў дзяцей і дарослых надоўга, а мы будзем вельмі рады пабачыцца зноў.
Матэрыял прадастаўлены аддзелам экскурсійна-метадычнай работы.