26 лютага ў галерэі “Лабірынт” адбылася другая лекцыя-канцэрт з цыкла “Прагулкі скрозь стагоддзі” пад назвай “Свяшчэнная трыяда класіцызму”.
На гэты раз слухачы пазнаёміліся з творчасцю кампазітараў Гайдна, Моцарта, Бетховена, якія ўвайшлі ў гісторыю як венскія класікі. Гармонія, радасць, яснасць формы, высокі стыль музыкі, у якой багаты вобразны змест увасоблены ў простую, але дасканалую форму, – вось галоўныя рысы класіцызму.
Лектар і вядучая Маргарыта Рукевіч таксама распавяла пра эпоху Асветы, гісторыю еўрапейскай культуры, звязанай з развіццём навуковай, філасофскай і грамадскай думкі. З дапамогай яркай прэзентацыі яна пазнаёміла прысутных з узорамі архітэктуры, жывапісу і моды таго часу, а таксама прывяла шмат цікавых фактаў пра жыццё трох геніяльных кампазітараў.
Канцэртная частка лекцыі дала магчымасць атрымаць асалоду ад музычных шэдэўраў вялікай трыяды: прагучалі санаты, перакладанні для фартэпіяна самых вядомых твораў, а скончыўся канцэрт выкананнем Оды “Да радасці” Л. ван Бетховена.
26 сакавіка а 15-й гадзіне прыхільнікаў класічнай музыкі чакаем на наступным канцэрце “Уводзіны ў рамантыку”.
Тэлефон для даведак: (8 017) 293 27 52.
Матэрыял пададзены аддзелам абслугоўвання спецыялізаванымі фондамі.