2 красавіка ў бібліятэцы прайшла адкрытая лекцыя “Аляксей Сапуноў – царкоўны гісторык”, якую прачытала прафесар, кандыдат гістарычных навук Валянціна Анатольеўна Цяплова.
Мерапрыемства адбылося ў межах выставы “Руплівец беларускай даўніны”, прымеркаванай да 170-годдзя з дня нараджэння гісторыка, археографа, краязнаўца Аляксея Парфёнавіча Сапунова.
Лектарка закранула важны аспект даследчыцкай дзейнасці віцебскага навукоўца, звязаны з царкоўнай гісторыяй краю. В.А. Цяплова распавяла пра велізарную ролю і значэнне, якую адыграў Аляксей Сапуноў у вывучэнні гісторыі праваслаўя на тэрыторыі Віцебшчыны і Полаччыны, прааналізавала выданні навукоўца гэтай тэматыкі і выявіла тэмы, якія былі ім найбольш распрацаваны. Была падкрэслена крыніцазнаўчая каштоўнасць прац даследчыка, акцэнт зроблены на такіх яго публікацыях, як “Краткий очерк исторических судеб Полоцкой епархии с древнейших времен до половины XIX в.” (змешчаны ў “Витебской старине”), “Судьба православия в Полоцкой епархии”, “Торжество православия” і інш.
Прафесар Цяплова адзначыла, што руплівая праца А.П. Сапунова – выдатны прыклад таго, як трэба вывучаць гісторыю царквы, яе святых і яе святынь.
Слухачамі лекцыі сталі студэнты Мінскай духоўнай акадэміі, а таксама ўсе зацікаўленыя, хто далучыўся да трансляцыі на Ютубе.
Запіс трансляцыі можна паглядзець тут.
Удзельнікі імпрэзы з цікавасцю пазнаёміліся з экспазіцыяй выставы “Руплівец беларускай даўніны”, якую можна наведаць у музеі кнігі да 2 мая 2021 г.
17 сакавіка 2021 г. ў Нацыянальнай бібліятэцы адбыўся круглы стол на тэму “Аляксей Сапуноў: спадчына збіральніка віцебскай даўніны” (запіс анлайн-трансляцыі можна паглядзець тут).
Матэрыял пададзены навукова-даследчым аддзелам кнігазнаўства.