30–31 мая ў Мінску адбыліся юбілейныя ХХV Міжнародныя Кірыла-Мяфодзіеўскія чытанні на тэму “Спадчына святых Кірыла і Мяфодзія ў сусветнай духоўнай культуры”.
Штогадовыя Кірыла-Мяфодзіеўскія чытанні вось ужо на працягу чвэрці стагоддзя аб'ядноўваюць спецыялістаў з Беларусі, краін блізкага і далёкага замежжа, якія працуюць у галіне багаслоўя, гісторыі, філасофіі, рэлігіязнаўства і іншых гуманітарных дысцыплін.
За гэты час канферэнцыя стала прызнанай пляцоўкай міжкультурнага і царкоўна-дзяржаўнага дыялогу.
Арганізатарамі форуму выступілі Міністэрства адукацыі Рэспублікі Беларусь, Міністэрства культуры Рэспублікі Беларусь, Беларуская праваслаўная царква, Нацыянальная бібліятэка Беларусі, Інстытут тэалогіі імя свв. Мяфодзія і Кірыла Беларускага дзяржаўнага ўніверсітэта, Беларускі дзяржаўны ўніверсітэт культуры і мастацтваў, міжнароднае грамадскае аб'яднанне “Хрысціянскі адукацыйны цэнтр імя свв. Мяфодзія і Кірыла”.
У рамках Кірыла-Мяфодзіеўскіх чытанняў 30–31 мая ў Цэнтральнай бібліятэцы Беларускага экзархата адбылася чарговая штогадовая навукова-практычная канферэнцыя “Духоўнае адраджэнне грамадства і праваслаўная кніга”.
У яе рабоце прынялі ўдзел больш за 65 прадстаўнікоў усіх рэгіёнаў Беларусі: кіраўнікі і спецыялісты публічных і парафіяльных бібліятэк, бібліятэк устаноў адукацыі, педагогі, пісьменнікі і святары.
На канферэнцыі прысутнічалі і спецыялісты Нацыянальнай бібліятэкі Беларусі: Вячаслаў Брычкоўскі, загадчык сектара аддзела карпаратыўнага ўзаемадзеяння, кандыдат тэхнічных навук; Вольга Рынкевіч, галоўны бібліятэкар НДА бібліятэказнаўства; Вольга Сабалеўская, галоўны бібліятэкар аддзела карпаратыўнага ўзаемадзеяння, і Кацярына Седнева, вядучы бібліятэкар НДА бібліятэказнаўства.
Вячаслаў Брычкоўскі ў дакладзе “Тэматычны сайт «Беларусь у інфармацыйнай прасторы» як даведнік па нацыянальных анлайн-рэсурсах” азнаёміў удзельнікаў канферэнцыі з актуальнымі інфармацыйнымі рэсурсамі, генерыраванымі спецыялістамі Нацыянальнай бібліятэкі Беларусі. Вольга Рынкевіч у дакладзе “З гісторыі асветніцкай дзейнасці бібліятэк Беларусі” акрэсліла праблемы развіцця асветніцкай функцыі бібліятэк Беларусі ў перыяд з першай паловы XIX да пачатку XX ст.
Матэрыял прадстаўлены навукова-даследчым аддзелам бібліятэказнаўства.