25 лістапада ў бібліятэцы адбылася прэзентацыя кніг казахстанскіх вучоных, выдадзеных у карагандзінскім універсітэце “Балашак” у рамках навукова-даследчага праекта “Карлаг: памяць у імя будучыні”.
Дакументы, звязаныя з Карагандзінскім выпраўленча-працоўным лагерам (Карлагам), доўгія гады праляжалі ў архівах пад грыфам “Зусім сакрэтна”. Паступова, вельмі выбарачна, пачалі прыадкрывацца архіўныя фонды, і сведкі страшных падзей прадставілі свае ўспаміны на суд шырокай грамадскасці.
Як адзначыў кіраўнік праекта Нурлан Арынбасаравіч Дулатбекаў работа над праектам ішла восем гадоў, на працягу якіх быў праведзены аналіз мноства дакументаў, вывучаны вялікі аб’ём архіўных матэрыялаў, адбыліся сустрэчы з былымі палітвязнямі, ваеннапалоннымі.
Карлаг – гэта адлюстраванне трагічнага лёсу ўсіх народаў былога Савецкага Саюза. За Карлагам стаяць лёсы тысяч бязвінных людзей, так званых “ворагаў народа”. Ахвярамі Карагандзінскага выпраўленча-працоўнага лагера сталі дзеці і дарослыя, простыя людзі і дзяржаўныя кіраўнікі, таленавітыя ваеннаслужачыя і вядомыя творчыя асобы.
Праект мае неацэннае значэнне для гісторыі, культуры і памяці нашчадкаў.