27–28 мая ў Мінску адбудзецца міжнародная навукова-практычная канферэнцыя “Архівы, бібліятэкі і музеі як інстытуты сацыяльнай памяці чалавецтва”.
Арганізатарамі выступілі Дэпартамент па архівах і справаводстве Міністэрства юстыцыі Рэспублікі Беларусь, Нацыянальная бібліятэка Беларусі, гістарычны факультэт Беларускага дзяржаўнага ўніверсітэта.
Навукова-практычнае мерапрыемства прысвечана абмеркаванню трансфармацый, якія адбываюцца ў сучасным свеце ў архівах, бібліятэках і музеях. Актыўнае развіццё інфармацыйных тэхналогій і інтэрнэту закранае не толькі формы зносін з карыстальнікамі, але і метады работы з тэкстамі дакументаў. Адказваючы на выклікі часу, архівы, бібліятэкі і музеі трансфармуюцца, але пры гэтым іх роля і значэнне як інстытутаў сацыяльнай памяці чалавецтва застаюцца нязменна важнымі і культураўтвараючымі. Форум уяўляе сабой адно з першых мерапрыемстваў у Рэспубліцы Беларусь, арганізаванае для комплекснага разгляду праблемы дакументаў, што захоўваюцца ў архівах, бібліятэках і музеях.
Пленарнае пасяджэнне і работа адной з секцый пройдзе ў Нацыянальнай бібліятэцы Беларусі. Работа дзвюх іншых секцый ладзіцца на базе гістарычнага факультэта БДУ. Пленарнае пасяджэнне пачнецца 27 мая а 10-ай гадзіне ў зале адукацыйных тэхналогій (3-ці паверх, пам. 346).
У рабоце канферэнцыі возьмуць удзел звыш 60 вучоных з Беларусі, Расіі, Украіны і Мальты. Падчас секцыйных пасяджэнняў удзельнікі з навуковага пункту гледжання ацэняць ролю архіваў, бібліятэк і музеяў у фарміраванні гістарычнай памяці. На працягу двух дзён на базе Нацыянальнай бібліятэкі і гістарычнага факультэта БДУ плануецца работа па наступных напрамках:
- Дакументальная спадчына як інфармацыйны рэсурс грамадства.
- Лічбавая трансфармацыя і інстытуты памяці.
- Змена запытаў да анлайнавых рэсурсаў архіваў, бібліятэк і музеяў.
- Праблема ўзаемаадносін карыстальнікаў і захавальнікаў інфармацыі.
- Размыванне межаў бібліятэк, архіваў, музеяў (архівы-музеі, бібліятэкі-архівы, бібліятэкі-музеі, медыятэкі і г.д).
Матэрыял прадастаўлены навукова-даследчым аддзелам кнігазнаўства.