23 мая ў бібліятэцы прайшло ўрачыстае пасяджэнне Нацыянальнай камісіі Рэспублікі Беларусь па справах ЮНЕСКА.
Юбілей уступлення Беларусі ў Арганізацыю Аб’яднаных Нацый па пытаннях адукацыі, навукі і культуры (ЮНЕСКА) – знакавая падзея, якая дазваляе прадэманстраваць вынікі плённага супрацоўніцтва.
У пасяджэнні прынялі ўдзел намеснік Прэм’ер-міністра Рэспублікі Беларусь Ігар Петрышэнка, міністр замежных спраў Рэспублікі Беларусь, старшыня Нацыянальнай камісіі Рэспублікі Беларусь па справах ЮНЕСКА Уладзімір Макей, намеснік каардынатара нацыянальных камісій сектара знешніх сувязей ЮНЕСКА Асель Уцегенава, прадстаўнікі сферы культуры і адукацыі, замежныя дэлегаты, СМІ і грамадскасць.
Для гасцей была падрыхтавана выстаўка "ЮНЕСКА і Беларусь: 65 гадоў паспяховага супрацоўніцтва". Жадаючыя маглі азнаёміцца з фотаздымкамі і архіўнымі матэрыяламі са збораў Цэнтра гісторыі Міністэрства замежных спраў Рэспублікі Беларусь і беларускай дыпламатычнай службы, Нацыянальнай бібліятэкі Беларусі, выдавецтва “Чатыры чвэрці”, Беларускай Асацыяцыі клубаў ЮНЕСКА, асабістых архіваў П.П. Латушка і У.Р. Шчаснага. На выставачных стэндах была прадстаўлена інфармацыя аб беларускіх аб’ектах Сусветнай спадчыны ЮНЕСКА.
У рамках мерапрыемства першы намеснік дырэктара Нацыянальнай бібліятэкі Беларусі Алена Далгаполава прэзентавала віртуальны праект “ЮНЕСКА і Беларусь: вехі супрацоўніцтва”. Рэсурс, размешчаны на афіцыйнай старонцы бібліятэкі, раскрывае важнейшыя напрамкі партнёрства краіны з міжнароднай арганізацыяй.
Цеснае супрацоўніцтва з ЮНЕСКА Нацыянальная бібліятэка вядзе з моманту атрымання статусу дэпазітарыя ў 1956 годзе. Па гэты дзень галоўнае кнігасховішча краіны займаецца фармаваннем, захоўваннем і папулярызацыяй калекцыі матэрыялаў ЮНЕСКА і яе шматлікіх камісій, прымае актыўны ўдзел у мерапрыемствах арганізацыі. У 2018 годзе бібліятэка была ўзнагароджана дыпломам Нацыянальнай камісіі Рэспублікі Беларусь па справах ЮНЕСКА за значны ўклад у захаванне беларускай культурнай спадчыны і актыўную дзейнасць у сферы міжнароднага гуманітарнага супрацоўніцтва.
Матэрыял прадастаўлены аддзелам сувязей з грамадскасцю.