17 лістапада ў межах рэспубліканскага інфармацыйна-асветніцкага праекта “КнігаСвет” у бібліятэцы адбылася рэспубліканская чытацкая сесія “Чытач – гэта культурны статус: расцём з «КнігаСветам»”.
Мерапрыемства арганізавана Нацыянальным інстытутам адукацыі, Выдавецкім домам “Звязда”, Нацыянальнай бібліятэкай Беларусі, рэдакцыяй “Настаўніцкай газеты” пры падтрымцы Беларускай праваслаўнай царквы.
Пісьменнікі і педагогі, выдаўцы і вучоныя, супрацоўнікі ўстаноў культуры, навучэнцы школ, студэнты каледжаў і ВНУ – чытацкая сесія сабрала ў Нацыянальнай бібліятэцы ўсіх, хто зацікаўлены ў росце прэстыжнасці чытання і літаратуры як нацыянальнай культурнай каштоўнасці.
На адкрыцці мерапрыемства з прывітальным словам выступіў старшыня Сінадальнага аддзела рэлігійнай адукацыі і катэхізацыі Беларускай праваслаўнай царквы епіскап Барысаўскі і Мар’інагорскі Веньямін.
Працягам сустрэчы стала пленарнае пасяджэнне, на якім прагучалі даклады намесніка дырэктара па навуковай рабоце і выдавецкай дзейнасці Нацыянальнай бібліятэкі Беларусі Аляксандра Сушы (“Педагагічны патэнцыял кніжнай спадчыны Францыска Скарыны”), члена прэзідыума Грамадскай палаты Саюзнай дзяржавы Анатолія Андрэева (“«Пастылая свабода» і вялікая лічбавая рэвалюцыя”) і галоўнага рэдактара часопіса “Маладосць” Святланы Воцінавай (“Часопіс «Маладосць» і школа: формы супрацоўніцтва рэдакцыі і настаўнікаў”).
У межах сесіі прайшлі прэзентацыя інтэрнэт-рэсурсу “КнiгаСвет” і ўрачыстая цырымонія ўзнагароджання пераможцаў віртуальнай выстаўкі “Фэст буктрэйлераў па творах Янкі Купалы і Якуба Коласа”.
Падчас працы пяці секцый адбыліся адкрытыя дыскусіі па тэмах: “Новае пакаленне – новыя тэхналогіі матывацыі да чытання”, “Сучасная літаратура, крытыка і літаратуразнаўства: узаемадзеянне і ўзаемаўплыў”, “Роля і магчымасці музеяў, галерэй, тэатраў у фарміраванні чытацкай культуры беларускага грамадства”, “Медыяадукацыя як інавацыйная прастора фарміравання кампетэнтнага чытача”.
На секцыі “Роля і магчымасці сучасных бібліятэк у фарміраванні чытацкай культуры беларускага грамадства” з дакладам “Фарміраванне інфармацыйнай культуры карыстальнікаў Нацыянальнай бібліятэкі” выступіла загадчыца аддзела даведачна-інфармацыйнага абслугоўвання Нацыянальнай бібліятэкі Беларусі Алена Тулупава.
Завяршылася рэспубліканская чытацкая сесія выніковым пасяджэннем круглага стала пад назвай “Да жывога слова”.