13 красавіка для навучэнцаў 9-х класаў ДУА “Гімназія № 6 г. Мінска” адбыліся бібліяграфічны ўрок “Героі Савецкага Саюза, якія вызвалялі Беларусь: па старонках друкаваных дакументаў і электронных рэсурсаў” і інфармацыйная гадзіна “Біяграфічная і бібліяграфічная інфармацыя пра Героя Савецкага Саюза Мамадалі Тапвалдыева” з цыкла заняткаў “Пастараемся ж і мы быць годнымі іх Вялікай Перамогі”, што рэалізуюцца Нацыянальнай бібліятэкай Беларусі да 80-годдзя Вялікай Перамогі сумесна з упраўленнямі па адукацыі г.Мінска.
Інфармацыйная гадзіна была прысвечана выхадцу Узбекістана, “...За асаблівыя заслугі ў развіцці партызанскага руху ў Беларусі” ўдастоенаму звання Героя Савецкага Саюза, Мамадалі Тапвалдыеву і яго ролі ў сістэме патрыятычнага выхавання Рэспублікі Беларусь. Пра франтавыя будні азіяцкага льва з Пандыгана (так Мамадалі называлі беларусы) распавялі старонкі друкаваных выданняў. Фотаархіў паказаў сустрэчы ўзмужнелых некалі маладых хлопцаў, партызан разведгрупы “Чэкіст” у пасляваенныя гады ў музеі гісторыі Вялікай Айчыннай вайны ў Мінску. Абмеркавалі змест фільма “Незабытая песня” (1974) і працу кінастудый Беларусі і Узбекістана над новым фільмам пра нашага героя з партызанскай мянушкай “Казбек”.
Бібліяграфічны ўрок “Героі Савецкага Саюза, якія вызвалялі Беларусь: па старонках друкаваных дакументаў і электронных рэсурсаў” уключаў прэзентацыю інфармацыйных рэсурсаў (сістэматычная картатэка артыкулаў, навуковыя рэсурсы адкрытага доступу, базы даных, якія набываюцца і генерыруюцца Нацыянальнай бібліятэкай Беларусі,) і бібліяграфічны агляд даведачных выданняў.
Практычная частка была накіравана на фарміраванне ўменняў работы з картачнай бібліяграфіяй пра Герояў Савецкага Саюза, вывучэнне структуры друкаваных выданняў і сістэматызацыі біяграфічных звестак. Рабяты азнаёміліся з элементамі бібліяграфічнага апісання артыкулаў пра нашых абаронцаў, навучыліся тэматычнаму пошуку і заказу літаратуры ў электронным каталогу, прагледзелі ў лакальнай сетцы электроннай бібліятэкі калекцыю выяўленчых выданняў, прысвечаную Героям Савецкага Саюза.
З мэтай замацавання атрыманых ведаў удзельнікі выконвалі заданне па пошуку і прадастаўленні інфармацыі пра Герояў Савецкага Саюза, якія вызначыліся ў галіне фарсіравання рэк, авіяцыі і разведкі. Перамагла Аліса Кажэўнікава, якая ўстанавіла найбольшую колькасць герояў, якія фарсіравалі Днепр (Л. Глебаў, М. Чыкураў, У. Ульянаў, С. Кузняцоў, М. Агароднікаў), Одэр (П. Калпакоў у р-не Радшуц і А. Рэпкін, Кебен), Дзясну (І. Рэпін).
Афанасій Карабейнікаў у ліку першых пераадолеў Паўднёвы Буг і Днестр на падручных сродках, знішчыў агнявыя кропкі ворага і ўтрымліваў плацдарм да падыходу асноўных сіл палка. Аляксей Кацельнікаў падчас Уманска-Баташанскай аперацыі першым фарсіраваў горны Цікіч і замацаваўся на процілеглым беразе. Харлам Рускіх пры фарсіраванні Дняпра 23 верасня 1943 г. першым з афіцэраў-пантанёраў пераправіўся на правы бераг, а затым на працягу 10 сутак перапраўляў праз раку танкі і пяхоту.
Мікалай Маслаў фарсіраваў Днепр у раёне вёскі Глушэц Лоеўскага раёна Гомельскай вобласці і прыкрываў агнём фарсіраванне ракі падраздзяленнямі. Георгій Тамілоўскі фарсіраваў Дзясну, Прыпяць і Днепр. Перадавы атрад Валянціна Паўлава прарваў абарону праціўніка на левым беразе Віслы, фарсіраваў рэкі Пілішча і Варта.
Дзевяцікласнікі пазнаёміліся з інфармацыйным патэнцыялам галоўнай бібліятэкі краіны, даведаліся, дзе атрымаць заказаныя кнігі і зрабіць ксеракопіі, наведалі выставы, прысвечаныя 80-годдзю Вялікай Перамогі. Бібліяграфічныя трафеі нечакана здабылі нашы госці ў картатэках рэцэнзій і персаналій. Настаўніца Аліса Шыловіч знайшла інфармацыю пра свайго дзеда – Георгія Шыловіча, беларускага савецкага празаіка, кінадраматурга, перакладчыка, журналіста, сябра Саюза пісьменнікаў СССР (1961). Дзевяцікласніца Элеанора Галаўко адшукала рэцэнзію А. Шышкова на кнігу “Деятельность Советов Белоруссии по осуществлению экономической политики в деревне в 1927–1936 годах” (1968), аўтарам якой з’яўляецца яе дзядуля Анатоль Галаўко.
Цыкл заняткаў “Пастараемся ж і мы быць годнымі іх Вялікай Перамогі”, прымеркаваны да 80-годдзя Вялікай Перамогі, уключае наступныя бібліяграфічныя ўрокі: “Даведачная літаратура пра Герояў Вялікай Айчыннай вайны”, “Воіны-інтэрнацыяналісты ў вызваленні Беларусі ад нямецка-фашысцкіх захопнікаў”, “Брэсцкая крэпасць-герой”, “Героі Савецкага Саюза, якія вызвалялі Беларусь: па старонках друкаваных дакументаў і электронных рэсурсаў”, “Біяграфічная і бібліяграфічная інфармацыя пра Героя Савецкага Саюза Мамадалі Тапвалдыева”.
Заказаць поўны цыкл або асобныя заняткі можна па тэлефонах: (8 017) 293 27 40, (8 029) 198 41 83; e-mail: polunchenkoolga@yandex.by.
Матэрыял пададзены аддзелам даведачна-інфармацыйнага абслугоўвання.
