23 снежня ў бібліятэцы прайшла інфармацыйна-асветніцкая імпрэза, прысвечаная 60-годдзю бібліяграфічнага бюлетэня “Новыя кнігі: па старонках беларускага друку”, а таксама прэзентацыя новага выдання “Беларусь вачыма бібліёграфа”.
“Новыя кнігі: па старонках беларускага друку” – старэйшае перыядычнае выданне бібліятэкі, якое штомесяц знаёміць з навінкамі айчыннага кнігавыдання і падзеямі гісторыка-культурнага жыцця. Сёння бюлетэнь з’яўляецца добрым дарадцай і памочнікам для розных катэгорый карыстальнікаў. Ён змяшчае цікавыя рубрыкі, спалучае бібліяграфічную інфармацыю з разнастайнымі аналітычнымі матэрыяламі і з’яўляецца карыснай крыніцай беларусазнаўчай інфармацыі.
Пра гісторыю і сённяшні дзень выдання, пра асоб, якія стваралі своеасаблівы бібліяграфічны летапіс краіны, расказала загадчыца навукова-даследчага аддзела бібліяграфіі Ірына Градоўкіна.
З віншавальнай прамовай звярнулася дырэктар Нацыянальнай кніжнай палаты Беларусі Алена Іванова. Ад імя ўстановы-партнёра калектыву бібліяграфічнага бюлетэня “Новыя кнігі: па старонках беларускага друку” была ўручана плакетка з падзякай за шматгадовае плённае супрацоўніцтва ў сферы нацыянальнай бібліяграфіі.
Прафесар кафедры бібліятэчна-інфармацыйнай дзейнасці Беларускага дзяржаўнага ўніверсітэта культуры і мастацтваў Валянціна Саітава падзялілася сваімі думкамі наконт выдання і яго значэння для падрыхтоўкі кадраў будучых бібліёграфаў.
З прэзентацыяй кнігі “Беларусь вачыма бібліёграфа”, створанай на падставе беларусазнаўчых матэрыялаў, якія публікаваліся на старонках бюлетэня, выступіла галоўны бібліёграф навукова-даследчага аддзела бібліяграфіі Наталля Барсукова.
З заключным словам выступіла намеснік генеральнага дырэктара – дырэктар па інфармацыйных рэсурсах Таццяна Кузьмініч, якая ўручыла першыя экзэмпляры выдання “Беларусь вачыма бібліёграфа” запрошаным гасцям Нацыянальнай бібліятэкі Беларусі.
На імпрэзе прагучалі віншаванні і відэазвароты з нагоды юбілею бюлетэня. Да мерапрыемства былі падрыхтаваны выставы, прысвечаныя выданням “Беларусь вачыма бібліёграфа” і “Новыя кнігі: па старонках беларускага друку”.
"Новыя кнігі: па старонках беларускага друку": за 60 гадоў выдадзена 720 нумароў (рэпартаж "БелТА").
Матэрыял падрыхтаваны навукова-даследчым аддзелам бібліяграфіі.
