16 лютага ў галерэі “Лабірынт” ладзілася ўрачыстае мерапрыемства, прысвечанае Дню абаронцаў Айчыны і Узброеных Сіл Рэспублікі Беларусь, “Гімн мужнасці”.
Напярэдадні Дня абаронцаў Айчыны Нацыянальная бібліятэка Беларусі сумесна з Міністэрствам абароны Рэспублікі Беларусь правяла прэзентацыю кніжнай выстаўкі “Гімн мужнасці”.
На выстаўцы прадстаўлены выданні пра ваеннае майстэрства, віды ўзбраення, гісторыю і сучасны стан Узброеных Сіл Рэспублікі Беларусь. Сярод іх шэраг даведачна-інфармацыйных выданняў ваеннай тэматыкі, кнігі пра гісторыю воінскіх фарміраванняў на тэрыторыі Беларусі ад глыбокай старажытнасці да нашых дзён, арыгінальны камплект з 12 дыскаў “Вооруженные Силы Республики Беларусь: новейшая история белорусской армии”, часопіс “Армия” і літаратурна-мастацкі дадатак да яго “Армия и культура”.
Адкрыла выстаўку намеснік дырэктара па навуковай рабоце і выдавецкай дзейнасці Нацыянальнай бібліятэкі Беларусі Людміла Кірухіна. У мерапрыемстве ўзялі ўдзел намеснік начальніка ваеннага інфармацыйнага агенцтва Узброеных Сіл Рэспублікі Беларусь “Ваяр” Уладзімір Аляксандраў, намеснік начальніка аддзела ваеннай адукацыі Упраўлення ваеннай адукацыі і падрыхтоўкі войск Узброеных сіл Рэспублікі Беларусь Андрэй Галаванаў, курсанты Ваеннай акадэміі Рэспублікі Беларусь, студэнты ваенных факультэтаў Беларускага дзяржаўнага ўніверсітэта, Беларускага дзяржаўнага ўніверсітэта інфарматыкі і радыёэлектронікі, Беларускага нацыянальнага тэхнічнага ўніверсітэта, Мінскага дзяржаўнага вышэйшага авіяцыйнага каледжа.
Выстаўка размешчана ў кальцавым калідоры 2-га паверха Нацыянальнай бібліятэкі Беларусі і будзе доўжыцца да 2 сакавіка.