Галоўны рэдактар выдавецтва Ларыса Языковіч расказала прысутным, як ажыццяўляўся праект па выданні дзіцячай энцыклапедыі пра Скарыну, аналагаў якой да гэтага часу не існавала. Яна падкрэсліла, што гэты трохтомнік стаў сапраўдным падарункам для чытачоў напярэдадні святкавання 500-годдзя беларускага кнігадрукавання.

Цікавыя факты з жыцця першадрукара адкрыў доктар гістарычных навук, скарынавед Георгій Галенчанка – вучоны, які ўжо не адно дзесяцігоддзе даследуе спадчыну Францыска Скарыны.

Прэзентацыя выдання прайшла ў форме пазнавальнай віктарыны. У запале былі не толькі дзеці, але і дарослыя: іх таксама чакалі пытанні на лепшае веданне фактаў з жыцця і дзейнасці першадрукара. Самыя кемлівыя атрымалі падарункі ад выдавецтва “Беларуская энцыклапедыя імя Петруся Броўкі”.

Аўтар дзіцячай энцыклапедыі пра Скарыну – намеснік дырэктара па навуковай рабоце і выдавецкай дзейнасці Нацыянальнай бібліятэкі Беларусі, культуролаг, кнігазнавец, старшыня Міжнароднай асацыяцыі беларусістаў Аляксандр Cуша. Ён адказаў на ўсе самыя нечаканыя пытанні дзяцей і цалкам авалодаў іх увагай, калі параўнаў Скарыну з Джэймсам Бондам! Гісторыю пра тое, як Скарына скраў лекара і друкара караля Прусіі, уважліва слухалі і дзеці і дарослыя. А сам аўтар нават выказаў прапанову зняць фільм па тыпу “Скарына-008” – бо штосьці ёсць у легендарнай асобе ад знакамітага шпіёна.

Атмасферу мерапрыемству задаў ансамбль старадаўняй і сучаснай музыкі “Брэвіс”, які змог перанесці думкі гасцей у той далёкі час, калі беларускае кнігадрукаванне толькі зараджалася. Напрыканцы мерапрыемства дзеці ярка расфарбавалі змешчаныя на мальбертах выявы Скарыны і напісалі побач словы падзякі і шчырыя пажаданні для аўтара.

Тэлефоны для даведак: (8 017) 293 27 56, 293 29 80.
Е-mail: pr@nlb.by