З 25 па 27 мая пройдзе Форум бібліятэкараў “Гуманітарна-асветніцкая дзейнасць бібліятэк у кантэксце агульначалавечых каштоўнасцей і беларускай дзяржаўнасці”.
Арганізатарамі форуму з’яўляюцца Міністэрства культуры Рэспублікі Беларусь, Беларуская бібліятэчная асацыяцыя, Нацыянальная бібліятэка Беларусі, Лагойскі раённы выканаўчы камітэт.
Плануецца, што ў форуме прымуць удзел больш за 500 спецыялістаў бібліятэк, а таксама прадстаўнікі Адміністрацыі Прэзідэнта Рэспублікі Беларусь, Нацыянальнага сходу Рэспублікі Беларусь, міністэрстваў і ведамстваў рэспублікі, Нацыянальнай акадэміі навук Беларусі, Нацыянальнага цэнтра прававой інфармацыі Рэспублікі Беларусь, Нацыянальнага цэнтра інтэлектуальнай уласнасці, Нацыянальнай кніжнай палаты.
У рамках форуму 25 мая ў Нацыянальнай бібліятэцы Беларусі адбудзецца круглы стол “Арганізацыйна-прававое і навукова-метадычнае рэгуляванне дзейнасці бібліятэк”.
На мерапрыемстве будуць разгледжаны праблемы павышэння эфектыўнасці дзейнасці бібліятэк рэспублікі шляхам выкарыстання інавацыйных рашэнняў і ўкаранення інфармацыйных тэхналогій, удасканалення прававой базы, якая рэгламентуе дзейнасць бібліятэк, фарміравання інфармацыйных рэсурсаў, развіцця матэрыяльна-тэхнічнага абсталявання.
Першае падобнае мерапрыемства ў гісторыі бібліятэчнай справы Беларусі датуецца 1921 г., калі адбылася І Усебеларуская канферэнцыя бібліятэчных работнікаў.