З 21 мая па 30 чэрвеня ў Нацыянальнай бібліятэцы Беларусі (2-гі паверх, кальцавы калідор) пройдзе кніжная выстаўка “У пачатку было слова...”, прысвечаная Дню славянскага пісьменства і культуры (24 мая).

Ці дасканала вывучаны кірыліца і глаголіца і як яны ўзніклі? Ці існавала пісьменства ў славян да Кірыла і Мяфодзія? Ці карысталіся нашы продкі рунамі і складовым пісьмом? Як дайшла да нас, вандруючы праз эпохі, складзеная, мяркуецца, жрацамі славянскага бога Вялеса ў ІХ стагоддзі “Кніга Вялеса” – бясцэнны найстаражытнейшы дакумент, унікальная крыніца ведаў пра мову, культуру, веру продкаў усіх славянскіх народаў? На гэтыя і многія іншыя пытанні можна знайсці адказы, наведаўшы выстаўку, якая прапануецца.

Кніжная экспазіцыя складаецца з 4 раздзелаў. У першым – “Славянскі свет: ад вытокаў да будучыні” – прадстаўлены матэрыялы міжнародных навуковых канферэнцый, прысвечаных айчыннаму славяназнаўству; кніга С.І. Касцяна пра гісторыю міжнароднага славянскага руху; стэнаграфічная справаздача ІХ Усеславянскага з’езда, які праходзіў у Мінску ў ліпені 2005 г.; працы найбуйнейшага спецыяліста па менталітэце народаў свету Г.Д. Гачава, а таксама гістарычныя кнігі, што змяшчаюць звесткі пра тэрыторыі рассялення старажытных славян.

У другім раздзеле асветлены перадумовы ўзнікнення і станаўлення пісьмовай культуры; пададзены жыццяпісы яе стваральнікаў – святых братоў Кірыла і Мяфодзія, а таксама іх вучня і паплечніка Клімента Ахрыдскага; сабраны каталогі кніг кірылаўскага друку, што знаходзяцца ў розных бібліятэках (у тым ліку і ў Нацыянальнай бібліятэцы Беларусі); адлюстравана гісторыя ўзнікнення славянскага кнігадрукавання і роля перакладаў Бібліі ў станаўленні славянскіх літаратурных моў.

У раздзеле “Параўнальнае мовазнаўства і гісторыя моў” прадстаўлена гісторыя праславянскай мовы; апісаны мовы славянскай галіны індаеўрапейскай моўнай сям’і; змешчаны артыкулы пра ўсе славянскія мовы (жывыя і мёртвыя, вялікія і малыя), даклады беларускай дэлегацыі міжнародных з’ездаў славістаў; хрэстаматыя арыгінальных твораў айчынных і замежных аўтараў, якія даследавалі тыя ці іншыя аспекты этналінгвістыкі.

Заключная частка экспазіцыі асвятляе традыцыйную духоўную культуру славянскіх народаў.

Кантактны тэлефон: 293-28-86.

Карысныя спасылкі:

Маскоўскі дом нацыянальнасцей

Дзяржаўная акадэмія славянскай культуры

Міжнародная славянская акадэмія

Міжнародны славянскі інстытут

Інстытут мовазнаўства РАН

Кафедра тэарэтычнага і славянскага мовазнаўства (БДУ)

Афіцыйны партал Беларускай праваслаўнай царквы

Інстытут тэалогіі імя свв. Мяфодзія і Кірыла БДУ

Міжнароднае грамадскае аб'яднанне «Хрысціянскі адукацыйны цэнтр імя свв. Мяфодзія і Кірыла»